求明牌

【文、圖／彭欽清／國立政治大學退休教授】

 

做神明儕
愛較自重兜仔
無採𠊎撿恁多分你口賽痢肚
就淨分𠊎著著三擺二獎定定
幾千萬仔好做麼个
楔牙縫就無罅喔
你摎𠊎聽真啊哩唷
這擺係再過害𠊎著該有个無个話啊
𠊎斯會變面喔
等𠊎膦火著起來
就摎你
手腳剁下來
目珠挖出來
鼻公割下來
頭那劊下來
擲擲到垃圾肚
𠊎斯講正經个喲
毋信你去垃圾場看啊哩哪
看分𠊎斬忒个神明有幾多仔哪
驚你恁老仔
目珠花花，桌布恅著菜瓜
𠊎摎你配一付進口个目鏡
戴起來看較真兜啊哩喲
面前个號碼係會著啊
就聖筊
係毋會著个話
就陰筊
笑筊就毋使仔哪
麼个時節
你還笑得出來
就恁仔講
（硈 喀）

（四縣腔）
彭欽清教授 聲檔 — 求明牌

▲BACK