憨癡客話

【文／羅肇錦∕中央大學客家語文暨社會科學學系榮譽教授】

 

　　近年來，因為後生客毋多會講客，就借國語詞彙鬥鬥落去，無就毋會寫客語漢字，就借國語字音來寫客話，結果寫出來个東西阿里不答，選用个漢字憨癡八瘌，在這位𠊎就講這種客話安到憨癡客話。比將講「太陽曬屁股」，抑係講「剛剛出去」，無就講「溫室个tomato」等等，就係用國語詞彙借來講客，結果搣到阿里不答、好笑又好噭，該憨癡客話還較孤盲，挑事用「天仙頓」表示「電線杆」，用「鴨黑媽該」表示「這是什麼？」像恁樣个阿里不搭憨癡孤盲个客話客文，拿來搞生趣弄古董還算已好搞，係講拿來教客話也係推廣客家文字，該就死孤盲哩，客話會搣到癌症去噢。

　　做麼个𠊎愛講到恁嚴重，罵到恁難聽呢？因為係客家話主體性个問題。假使推廣搶救客家話客家文化，無從客家本質來起手，做較多搶救，花較多錢都無採工，大家煞猛保存个係別人个東西，煞猛學个毋係客家祖先留下來个東西，該兜東西同別人共樣，仰還愛這兜前世無修个客人去操煩。故所奉勸客家人毋好恁無目水，恁無自信，驚人聽毋識个客話，就借別人个話來講分人聽，該恁仔就毋係講客話了。當然，有人會講借國語音國語字，對毋曉客話个人來講，學起來較方便較簡單，也學來較遽。這種想法雖然有厥道理，但係想較徹底兜仔，借別人个話來學根本就無意義，客話值得保留發揚个，主要就係佢有同人無共樣个特色，拿忒這兜特色，客話就無客話保留个意義，故所「日頭」還係愛「日頭」，做毋得變「太陽」，「堵堵出去」就愛「堵堵出去」，做毋得「剛剛出去」。相同个道理，「電線」就「電線」，做毋得用「天仙」，「麼个」就係「麼个」做毋得用「媽該」。

　　這兜憨癡客話盡嚴重个係大眾媒體同流行歌曲，一般寫歌詞作曲主要係愛分人接受遽容易學，故所盡量採大家都看得識唱來簡單个歌詞來表達，加上有兜作詞者毋會客話或者無麼个會客話，當然寫出來个歌詞就當多阿里不答憨癡亂鬥。至於大眾媒體个客話，係因為講話个人客話毋流掠，但係又愛隨時講客話，臨時及急个情況下，就用佢盡熟悉个國語來代用，難怪一般客話盡無準則，盡多會走樣走種个就係流行歌曲同大眾媒體个客話。希望作曲先進後出个才人，也講廣播電視个名人，盡量講好若个客話，正無會教壞別人，致使客話變憨癡話，客人變憨癡人。

　　盡背尾，𠊎還聽講有已有名个客家才人，特別煞猛鼓勵大家來寫客家个火星文，推廣借國語音來寫客家文，這正經係前世無修，祖德流荒，𠊎在這誠心拜託，恁樣个事頭，搞搞啊哩就好，做毋得搣到遰著，愛請人來救火就大事哩。

（四縣腔）
羅肇錦教授 聲檔 — 憨癡客話

▲BACK