【母】字个討論

【文／范文芳∕國立清華大學中國語文學系退休教授】

 

ㄧ 從字形講起

　　【母】字，在漢字个字形結構上，係在【女】字胸前加兩點，表示發育成熟，可以哺乳養育子女个女性，在六書个理論上，係指事字。

　　在字形个演變過程中，【母】字頭上加毛髮，變成【每】字，其中兩點連成一線，變成【毋】字，但係【毋】【每】兩字，同【母】字，只有字形、字音个相關，並無字意个相關。

二 從字形到字意、詞意

　　1 生、養新生命个母體，係名詞，人稱【母】、【母親】，家畜稱【雞母】/【母雞】。

　　2 兩性生殖个生物，雌性一方稱【母】，雖然還未生養子女，也可稱母，華語【小母狗】係泛稱雌性小狗。

　　3 漢語辭彙中【公/母】【雄/雌】在構詞方面，除了前兩項合義詞之外，另外有一種附加式个構詞，【公】【母】都無父母、雄雌个字義，語言學稱詞綴，客語常用詞【蝦公】【薑母】係例證。蝦不分公母都稱公，薑不分雄雌都稱母。

　　4 語言學中常用術語，漢語字音結構，有聲母、韻母之稱，聲音元素又分輔音、元音，漢語音韻學習慣稱元音為母音，稱輔音為子音，語言學所講母音，已經超越生物學个雌性、母親原意，轉換成重要元素个意思。

三 構詞法改變會影響字音、字義

　　用客語為例，【母】字用在不同个習慣講法｛包含構詞法、詞性轉換｝，其字音會有不同，當然語意就會無共樣。

　　1 父母、母親文讀音｛mu｝
　　2 阿母、舅母講話音｛me｝
　　3 狗母、牛母講話音｛ma｝
　　4 舌母、薑母講話音｛ma｝有人為了有意區別，另外借用【嘛】字。

　　客語此類構詞特別多，刀母、鑊母、糟母、粄母、拳頭母等，都係詞綴。

四 台灣現代漢語，歸結起來，對【母】字个音讀有下列情形

　　1 台華語最單純只發｛mu｝之音，例如母親、伯母、母舅、母羊、薑母。
　　2 台福語有兩音母親、阿母、狗母、拳頭母都音｛bbu｝。
　　翁母【指夫妻】、阮母【指吾妻】、母子二人都音｛bbo｝
　　民間習用【某】字，其實不必如此。

五 順續講著毋、無、麼三字个台語用法

　　1 從語法个角度來看 【毋】係副詞，音｛m｝多放在動詞前，毋著、毋是、毋食、毋做。台華語多用【不】，台客語少用【不】，只有【不得了】一語。

　　2 【無】係形容詞，多放在名詞前，無閒、無錢、無頭路、無子女。

　　3 【麼】係疑問語氣詞，多放在句尾， 好麼？著麼？愛去麼？

　　4 客語常用【麼个】，台華、台福慣用【什麼】

　　5 台華語常用【沒】，台福、台客都應該用【無】。台語只用在【埋沒】一語。


（海陸腔）
范文芳教授 聲檔 — 【母】字个討論

▲BACK