七星墜地

【文、圖∕徐貴榮∕國立中央大學客家語文暨社會科學學系兼任助理教授】

 

　　頭擺个澗仔壢，就係這下个中壢。佢恬恬仔睡到歸片荒埔項，兩條細河壩，像兩條血筋樣仔，平平流過。在這一大片个荒埔項，生草齬外，毋係陂塘，就係雜樹野生，滿哪仔就石頭礫矻，泥肉淺薄，種毋起麼个作物，僅可種兜仔番豆做得，比毋着桃園恁好。

聽講當久以前，天頂个北斗星君長透會下凡，來人間查看，順續來凡間遊尞一番。聽講當年北斗七星，看着澗仔壢這片闊野野个荒埔，恬靜罅闊，無人吵鬧，輒輒變到七個老人家，相湊在月底，抑係初一、二三仔个半夜時節，到這吟詩作對，飲酒暢樂。

有一暗晡，無月無光，又有兜濛紗，北斗星君當久無共下暢樂吔，就準備酒菜，變到七个老人家，相湊來到澗仔壢。怕係天時靚，氣氛又好，心情特別鬆爽，一坐下來，逐儕就食到酒醉摸些，昏哆昏哆。一時毋記得時辰，嗄食過頭，毋知天會光吔。一聽啊着雞啼聲，頭臥啊起來，看着天普白普白，大家著驚一下，舂頭磕額，抹羅抹掣，相賽尋馬拂仔个尋馬拂，解馬索个解馬索，走較要緊，遽遽跳上馬背，拿起馬拂仔，「海」一聲！各儕騎等馬仔騰空走去，一時間，揚起灰塵，歸隻打早个天公，分這灰塵遮淨淨。

等灰塵跌落下來過後，在這片平洋个荒埔項，嗄變出七個高起來个泥堆，像北斗七星排列樣仔。在這擺過後，北斗七星就無再過變到老人家，下凡到這位飲酒暢樂吔，日久以後，這七個泥堆就分人安到「七星墜地」。

到這下，這七星墜地，全部係寶地，變到學校用地，分別係中央大學、中壢高中（這就係日本時代係中壢神社地）、育達商職、中壢高商、復旦中學、中壢家商、新明國中這兜學校，名聲全部都異好。

（神話架構感謝徐有聲先生提供，本文原刊《文學客家》第11期）


（四縣腔）
徐貴榮教授 聲檔 — 七星墜地

▲BACK