鍾理和故居

【文、圖／鍾榮富／南臺科技大學應用英語系講座教授】

 

　　咸豐七年(1857)水打莊以後，大路關就分水隔做兩莊，北邊多砂石，一片平陽，落雨後看哪去，親像汪洋大海，當地人喊這地方安到「河壩」。又因為頭擺尊拜个石獅公，堵好在這莊頭，故所又安到舊大路關。南邊這莊，多山坪，多竹頭躉，分人安到「平頂」，也喊著新大路關。平頂麼个都無，山坪盡闊。日本時代到今，平頂个山坪都種黃梨。新舊大路關各出一項值得客家人知得个文化項目：新大路關个鍾理和故居，同舊大路關个石獅公。

　　鍾理和(1915-1960)係盡有名个台灣鄉土小說家，寫作以寫實為主調，創作个源頭主要係客家鄉村个農民生活，可以講大部分都係作者自身个生活經驗，佢看著个，佢愐著个，佢聽著个，佢關心个都化成文字，變作文學作品，構成台灣文化不可缺少个磚石。

　　鍾理和出生啊在屏東縣高樹鄉廣興村(昔日稱為「大路關」)，家族係當地个望族，伙房盡闊盡大。佢爸鍾蕃薯先生在屏東地區蓋有名望，遠在大正八年(1919)就分鍾家公嘗（現改名為「公號鍾伯義」）推選為管理人。鍾蕃薯先生不但會做生理，還熱心教育，故所鍾理和兄弟都識字。早時，理和先生在平頂个黃梨山帶工，做工頭，下把下還會同做工个村民共下唱山歌。聽講，理和先生人生啊蓋好看，歌聲又炙，歌詞內容特別有感情，盡多莊上个細妹仔足滿愛同佢共班。閒時，理和先生也會同人去牛角窿掌牛，釣哈蟆蓋厲害。

　　理和先生後來搬去美濃个尖山仔（笠山），愛著鍾台妹(鍾平妹)，兩儕都姓鍾，在當時个社會壓力之下，選擇走去東北同北京等地區，開始佢寫作个漫長歲月。理和先生1945年在北京出版了第一本小說集《夾竹桃》，還吂前看著作品个銷路，就在第二年（1946）歸來台灣。不單恁呢，佢歸來不久煞得著肺結核，須要在醫院同屋下之間來回奔波。肺結核係富貴病，愛食好，又使毋得忒操勞，生活个重擔落啊在平妹一个人身上，這種經驗後來寫啊在〈貧賤夫妻〉裡肚。在百般無奈何之下，平妹還係支持理和先生繼續寫作，為台灣文學留下難得个資產。1960年，為了修改中篇小說「雨」，理和先生在桌頂項嘔血過多，不幸往生。佢人生最後个一滴血，紅糾糾唉流啊在遺稿上，後人尊佢「倒在血泊裡的筆耕者」。理和先生全部作品，不同時期有各種版本，最近个版本係高雄縣政府在2009年出版，經過鍾鐵民同鍾怡彥共同編輯校對个八冊大作。

　　鍾理和故居係佢出生到十八歲歇个地方，年久失修，漏風漏雨，後來經過客委會出錢出力整修以後，開放分大家參觀。故居係紅磚紅瓦个傳統客家伙房，入門就係天井。頭擺有一頭玉蘭花，臨暗風吹啊來，到位都有花香。行過天井，廊仔下分左右兩片，右片係間房，間房後背係灶頭。左片係廊下，有圓桌也有長凳。頭擺人客來尞，就在這泡茶講事。廊下脣有古色古香个窗仔，頂項貼等『清風』兩隻紅字。壁角有一个書櫥，放等幾本有關理和先生作品个書，外表看來，書有各種色型，在午後个日頭下，特別有一份安靜个感覺。


（四縣腔）
鍾榮富教授 聲檔 － 鍾理和故居

▲BACK