「鴨黑媽該」做得救客家？行銷客家？

【文∕雲起居士】

 

　　屙膿滑痢亂搞活動？愛好好屌射主辦單位，還有補助單位！發大冷？目前客家有大多數，字音義皆已考據無爭議可共識解決！北市客委會日前舉辦「鴨黑媽該」系列三个月之藝文徵稿摎講座活動。火山孝子錢亂花！應該用心用各種活動深化正確个信雅達母語詞彙教育，那有這種文化大革命式來反智又無水準來碌澩碌濞？傳承客家文化靠「北京話」發音个不褡不膝「中文詞彙」影射教育？請大家用電話緊鈴，表達正知正見正念，莫分這高毛夭壽準搞生趣。

　　用屙膿滑痢个「北京話」發音？來落用「火星文」个反智又無營養个所謂創意詞彙？達到教所有後生人在加護病房內歡喜大聲講客話？正經可使得有效率積極提升客家語文程度為國家語言？這種發神經个邏輯？象牙塔也會起雞嫲皮！越係資源有限，時間有限，危機意識越嚴重，越更加愛用建設性、健康性个教育意義摎創意，深入淺出置入信雅達个母語於聽講讀寫能力个培養。毋係這種走火入魔，急病亂搣个反智庸俗愚民策略。

　　世上無一隻國家係用「火星文」推廣其語文教育！世上無一隻國家个大細考試毋對「火星文」扣分。詩歌、音樂、戲劇、書畫、藝術等有關各種語文創作表現形式，應該係用「這係麼个」積極創作提升各種意境內涵，而非以「鴨黑媽該」再旁細字註明北京詞彙(這是什麼)，以跳樑阿丑琢式个「火星文」創意，發揚傳承客家文化？敢做得使所有人增加聽講讀寫个客家語文能力？這就係形塑「客家話」蛻變為未來「國家語文」个發展政策？

　　目前「客話」已係「國語」，乜係「公共語言」，還停留在鄙俗係「鄉土語言」个專利迷思？須知鄉土語言完全無鄙俗，相對來講比「北京話方言」保留較多信雅達音韻義摎詞彙內涵，無奈制式教育目前仍係「搞假球」，吂將「國語教育」即時正式列入國民義務教育之肚。遙想台灣歷經日據摎國民政府來台，這百年分別將「日語」及「北京話」尊為國語在制式國民教育體系肚，使所有國民養成以「日文國語」同「北京話國語」思考在聽講讀寫行為肚。今日理應撥亂反正回復將各「族群母語」在學校教育體系肚，世上各國凡有「多種官方語言」者，已將所有各「國語」皆列入其制式教育數十多年，也有非常多成功經驗，非不為也，實不願為也！運用國家公權力政策執行教育制度，充分體現憲法權力及精神，保障全體國民接受母語學習教育个基本人權，無斯就係政府失職，政黨騙選票！

　　泱泱台灣主體性，建構同心圓思想个狹隘偏激觀念，竟然天龍國首府，天方夜譚用「火星文」行銷母語教育之內涵？用理性邏輯論辯个對話，正係了解價值觀念偏頗所在！無深思熟慮，溫水煮蛙愛等幾時？吾等有極多優秀个母語薪傳師，正可列為種子教師體系，通令全國各級教師皆須限期補修「母語學分」，想當年這百年來「國語師資講習所」成功實施制度，黏時就知效率一竿見影！大家所需要係整體學校教育體系肚正式執行「母語國語化教育」！毋係「細人搞旮旯伙」，名存實亡逐禮拜幾堂無兩小時个《鄉土社團》性質个學習活動，屆時毋使強制學生「掛狗牌」罰「五角銀」，保證毋出二十年，國語母語化、母語國語化！制度个誘因摎績效設計當容易，大有為个政府，一流个官員人才恁多，敢會全耐毋何？

　　越多教育創意模式當然越好，毋過大原則愛正向性，宏觀性，前瞻性，建設性，圓融性。而非破壞性，反智性，無知性，庸俗性，愚昧性。用正確國字形音義直接教學，亦可趣味生動活潑帶動氣氛，該係學校先生教學能力摎教材設計个問題。以「火星文」來達到深化教育目的同教學品質，世上任何人也毋相信「火星文」有恁偉大个魔力。特別遊戲筆墨，獻醜一幅「高漠邀獸追」壽輓兩用楹聯，敬貢天龍國諸高賢笑納。麼个正係文化藝術創作？麼个正係所謂个「火星文」創意？麼个正係母語素養个教育？盡驚怕恁無水準个地圾，屙糟到毋食人間煙火个目珠，該就罪過囉！

▲BACK