初心者市集

【文圖∕薛常威∕國立中央大學客家語文暨社會科學學系在職專班碩士生】

 

“ 夢想在哪位？就在這市集開始。一場場个市集係初心者生活个磨煉，夢想、汗水、暢樂、熱情、無人客，俚係新手。俚兜共下在夢想个路項勇敢進前，一如初衷，俚係初心者。”
……. 這係初心者名片上个幾句話。

在日文裡肚，「初心者」有新手摎初衷个含意。兩個共下在關西成長个細阿姊，摎自家个手作擺到擺攤頂，原旦就無熟識，在一擺市集裡肚，相識交心，也開始有這「初心者市集」。


今年一隻緪火燒𤊶个下晝頭，在關西石店子，𠊎拜訪初心者兩個得人惜又開洋个細阿姊。佢兜熱情招待𠊎啉關西个特產：仙草。這乜係𠊎對關西个老頭腦印象。其實，因爭有兜轉鄉青年个煞猛，這下个關西既經無共樣了。

初心者市集成立於2016年，由新竹關西一群對家鄉摎藝文當熱愛个後生人所推行个，主要在新竹地區推廣（關西老街、橫山合興車站），愐想分更多優質个新秀品牌有一隻展現个平台，乜期待對夢想摎熱情毋會摎切衷毋記得去！也期待用市集个方式串連更多在地手作創作品牌，配合地方特色活動，分市集更生趣，有更多無共樣个搞法。

初心者，既經在關西摎新竹各地辦過當多場摎傳統市場無共樣个市集。市集肚，職業高手分享嶄然慶个工藝技術，展出各自个手作產品，在地个小農乜帶來佢兜又萋又新色个農作品。關西本庄人愛看著來自南北各地特產个機會當大，外地个人客乜因為一擺一擺个市集又更加認識關西。

兩個後生人摎一隻在地个石店子老街基地：關西關係實驗生活1號店。這隻空間係用來舉辦表演、講座摎活動个。追求社區共好、人摎人合作个概念，斯像一間實驗室，創造更多未來个可能。


關西早就毋係俚老頭腦个關西咧！

（四縣腔）
羅金珠 聲檔 — 初心者市集

▲BACK