客話个特殊構詞AAAA

【文／羅肇錦∕中央大學客家語文暨社會科學學系榮譽教授】

 

　　客家話常用詞彙肚項，有一種當特別个結構，一連用四隻共樣个詞AAAA，來表示「一直連續無停个聲音同狀況」，像噥噥噥噥、流流流流、咻咻咻咻這兜四連詞，就係這篇短文愛講个主題。這種四連詞係客家話特有个用法，其他像台灣个國語、學老話等等漢方言就全無恁仔个結構◦

　　這種四連詞个聲調（四縣）係：面前兩个低平調；後背兩個高平調◦像gongˇgongˇgong gong （吊著个長條物不停擺盪），前兩个gongˇ讀低平調，後兩个gong讀高平調◦因為這兜四連詞差毋多就係有音無字，故所下背採用客語拼音个方式來表示◦這兜詞大概做得分連聲、連樣、連感三大類：

　　第一類連聲四連詞：這種詞差毋多就係連發四下共樣个聲音來表示連續無停个聲音動作，在苗栗一帶蒐集到个有八個，像肚饑該下肚屎goˇ goˇgo go ，雞仔肚饑抑係嚇著該下goˇ goˇgo go ，一畲人嘴緊念毋會停安到nungˇnungˇnung nung ，大水流無停boˇboˇbo bo ，做工當大聲gungˇgungˇgung gung ，睡目凝覺鼻公出聲無停koˇkoˇko ko ，哨仔笛仔聲biˇbiˇbi bi ，歸日吵毋會停像貓仔叫安到ngiauˇngiauˇngiau ngiau ◦

　　第二類連樣四連詞：這種詞差毋多就係連發四下共樣个聲音來表示連續無停个樣相動作，在苗栗一帶蒐集到个有六個，像東西當滑抑係口涎流無停liuˇliuˇliu liu ，老人長輩吩咐叮嚀講毋會停ngiamˇngiamˇngiam ngiam ，吊等个長長个東西槓來槓去gongˇgongˇgong gong ，兩畲加等肩頭無目的亂行doˇdoˇdo do ，飲醉个人抑係正學行个細人仔行路diaˇdiaˇdia dia ，口涎水流毋停ioˇioˇio io ◦

　　第三類連感四連詞：這種詞差毋多就係連發四下共樣个聲音來表示連續無停个感覺表情，在苗栗一帶蒐集到个有六個，像肚屎略略个溫溫仔一陣一陣仔痛vunˇ vunˇvun vun，牙齒手腳神經性抽痛xiuˇxiuˇxiu xiu ，賊仔偷東西前看地形尋對象也用xiuˇxiuˇxiu xiu ，又雜又亂个草絮遮著安到mangˇmangˇmang mang ，頭腦毋清楚講東應西安到ngoˇngoˇngo ngo ，戇戇當當講毋分漿ngaˇngaˇnga nga ，偷偷掠掠驚人知个行為soˇsoˇso so ◦

　　除忒頂項三類四連詞以外，口語中還有一个ngoˇngoˊngoˋngoˋ同ngaˇngaˇnga nga意思當相像，但係聲調無共樣，無辦法放到這三類肚項，特別愛在這做一個交代◦以上二十一个AAAA結構个四連詞，無半隻係入聲字，這同早期个客話無入聲字，堵好共樣，也同目前个畲話、瑤話當少入聲現象當接近，值得大家好好思考◦

（四縣腔）
羅肇錦教授 聲檔 — 客話个特殊構詞AAAA

▲BACK