阿啾箭觜鷂婆

【文、圖∕彭瑞珠／國立中央大學客家語文暨社會科學學系客家語文碩士班畢業生】

 

新曆六月頭个臨暗仔，𠊎對觀音駛車仔愛轉桃園。遠遠，看著一隻比泥色較深色个大鳥仔飛過來，後背跈等一隻烏色个細鳥仔。吾心肝肚想「這兩種鳥仔，仰會感情恁好！共下搞？還搞到恁暢。」𠊎還吂想真，飛頭前个鳥仔就分後背个鳥仔觜一下，險險踤忒！座頭前个，怕係還吂大盡个細鷂婆，自家出來學尋食吔；座背尾个，係地域性當強个阿啾箭，平常時老鴉仔、鷂婆若係偎近著厥鳥竇，定著會分佢逐走。莫講，係六月仔當出子个阿啾箭，該斯盡惡哦！

𠊎歇个大樓附近仔還有田坵，田坵脣个樟樹頂有阿啾箭个鳥竇，樟樹就在大家愛去火車頭个大路脣。舊年六月仔，異多人騎奧多拜在該位過，好恬恬分阿啾箭觜到喊阿姆哀。阿啾箭飛到又遽、觜人又準，異多人分佢觜著，有人就譴到喊電視臺來主持公道，包尾電視新聞緊報，里長煞煞吊一垤牌仔在樹身講「此處有小鳥會啄人，路過請小心！」。

阿啾箭係兜輒常看得著个鳥仔，一身烏色合身个西裝著等，看起來盡紳士。還細時節田坵个牛背頂、今這下都市个公園，不時在高高个樹尾頂，都會看著佢。佢總係「嗟酒！嗟酒！」在該湊伴，該聲哨也異好認。毋過，厥身體就無幾多兩重，仰會毋驚比佢大幾下十倍个鷂婆呢？

講著鷂婆，在臺灣輒常看著个鷂婆，華語安到「黑鳶」；英文講「black kite」，轉做客話講就係「烏色个紙鷂仔」。鷂婆个身體有一、兩斤重，五、六十公分長，厥兩個翼胛閕開來，就摎人兩隻手閕開來差毋多恁闊。厥目珠盡利，在天頂飛到高高，乜還看得真田坵肚走出空个田鼠。故所頭過，係聽著人家喊「鷂婆來哩喲！鷂婆來哩喲！」大家都會遽遽去抓雞弇仔，摎雞子弇揫來，莫分鷂婆夾走去吔。臨暗仔，輒常看得著佢兜湊伴在天頂共下飛、共下搞，歸陣仔共下轉竇，佢兜做得食到兩、三十歲哦。

鷂婆異大隻，好得厥翼胛會摎佢𢯭手控制氣流、穩定方向，故所佢兜飛來異在，飛到異好看。毋過，阿啾箭係飛行高手呢，飛起來盡遽又一下高一下低，飛等該下都還做得旋風頓恬、轉斡。故所，鷂婆个尾翼抑係翼胛个長鳥毛係分佢觜著，就會「打踜蹭」。莫講，係分六月仔个阿啾箭觜著，該斯怕異食力！

人講「人仔細細有斤兩，麻仔細細斯噴噴香！」萬項事項不見得係用「大」、「細」來論。「大」、「細」、「重」、「輕」先不論，一儕人个能力摎面對事情个態度，摎輸贏面怕有較大个關聯。總講，在六、七月仔阿啾箭出子个時節，還係閃較遠兜仔，分阿啾箭安心孵子較贏。看阿啾箭觜鷂婆，觜到恁煞，就知佢護子个決心哩。


（四縣腔）
彭瑞珠 聲檔 — 阿啾箭觜鷂婆

▲BACK