話頭

【文／范文芳∕國立清華大學中國語文學系教授】

 

　　台灣客話用漢字書寫，係合情合理也係方便法門，我想結合語言學理論摎書寫个實用原則，來討論客話个用字問題。

　　我個人想根據自家對台灣客家文化个認識摎感情，參考現代語言學个專業理論，對於台灣客語用漢字｛中文｝書寫，提出個人个看法，有成時會提出摎官方規範用字無相同个意見，也請大家參考。

　　技術上，我會考慮著字形結構、字義演變、字音个方音差異摎古今音變、構詞方式、習慣講法等因素，我個人个理想，毋單淨係保存客語，還希望提升客語个實用價值摎未來發展前途。

一　從祖、且、姐講起

　　傳統个客家人，盡重視敬阿公婆，對歷代祖先也非常尊従，台灣客家有｛來台祖｝个專有名詞，過年過節還講究敬拜阿公婆，其實【祖】裡隻字，在漢字个源頭，係【且】。且字，在現今个台灣客語，盡少用著，不過，【姐】字在台灣客語文化中，顯現了非常特殊个人文風格。

　　1　【且】字最原初係象形字，古文字學者有多種解讀。

　　　　甲　高鴻縉本意為祖廟，上象廟宇，左右兩牆，中二橫為楣限，下則地基也。｛參見王延林編　常用古文字字典　文史哲｝
　　　　乙　左民安象古時放置祭品之禮器。｛參見 細說漢字｛北京九州出版社｝
　　　　丙　許慎薦也，从几，足有二橫，一其下地也。｛參見 說文解字｝
　　　　丁　谷衍奎且與祖、俎同源，象雄性生殖器形，是初民生殖崇拜之體現。
　　　　｛參見　漢字源流字典　北京　華夏出版社｝

　　參考以上幾種講法，再聯想人類之民俗信仰，像埃及金字塔、南太平洋復活島上个巨石群，藏族疊石敬拜，台灣客家民俗个石爺、石娘、石頭伯公、石觀音崇拜，都可以論證且、俎、祖之間个字義連接。

　　2　【姐】字在漢字个結構規則上，係形聲字，从女且聲，部首【女】表意，指女性，【且】係表音个偏旁，不表意，漢字用【且】表音不表意个常用字有祖、俎、組、阻、詛、沮、狙、疽、姐、飷等。

　　3　歸納以上幾個漢字，由於古今音變摎方音差異，可以整理出聲母為精、清兩類，韻母為假、遇兩攝。就字音來講【姐】有｛ji｝｛jii｝｛jia｝｛jie｝｛je｝等五種，台灣客話稱阿姐，四縣腔音ji海陸腔音je，台灣客話稱外祖父母為姐公、姐婆，四縣音jia gung，jia po海陸音相同，僅係調形不同。

　　4　台灣華語姐音｛jie｝海陸客語音｛je｝，可解釋為韻頭併入聲母。

　　5　台灣客語辭彙比較特殊之處，同姐相關者有稱同輩之年長女性為【阿姐】　稱妻為【姐仔】稱母為【姐】，前不可加詞頭【阿】，後不可加詞綴【仔】，說文也說蜀人呼母為姐。稱母親之父母為【姐公】【姐婆】。

　　6　漢字姐、姊、姉三字可通用，假使有某種方言認其中某字有貶意，係其特例。


（海陸腔）
范文芳教授 聲檔 — 話頭

▲BACK