白馬傳奇

【文、圖∕徐貴榮∕國立中央大學客家語文暨社會科學學系兼任助理教授】

 

　　中壢高中頭前个「白馬莊」這一搭仔，頭擺還吂起白馬莊之前，係一大片个田，也有人在該種當多朳仔。本來耕田人就係望天落雨，望田岀穀个人。毋過聽講這位仔，毋知從哪久開始，到禾仔當靚抑係飽胎个時節，長透會有一隻白馬仔，到臨暗時，會利用人睡目个時節，亂踏農田，偷食禾仔，到天光又尋無蹤，走無影，這兜耕種人譴死咧！

　　年視年，白馬仔無時無節就會來爽禾仔，在這耕種个人實在佇毋著吔，就集合起來講愛輪流䀯等，等馬仔行前來偷偷仔同馬仔㓾忒去。有一暗晡，無月無光，暗摸胥疏，這兜耕種人在田肚恬恬仔䀯等，等到半夜，該條白馬仔斷真食一路來。還緊食禾仔，緊探頭這望該望，毋過，佢絕對無想着這擺人會對準佢來。

　　等到白馬仔行前來，在田脣䀯等个人，毋聲毋矻，拿等劈鐮劈啊落去，扚對剁着白馬仔个一支前腳，從此，白馬就走到無魂無影，毋知哪去吔，毋識再過倒轉來食禾仔。

　　光復過後，大約係三十七年尾，政府廢中壢神社，改起中壢中學。神社廢忒吔，神社前个銅馬還在，就在老教室面前。過無幾多年，朝晨頭早早去學校運動个附近民眾，發現銅馬个前腳分人剁斷吔，就傳講「頭擺个白馬仔分人剁斷前腳，化身變到中壢神社个銅馬。」結果傳來傳去，三人成虎，歸隻中壢街頭就在該傳。講「中壢中學个銅馬（如圖），利用暗晡頭變到白馬仔，走出去偷食附近仔个禾仔，分人剁斷前腳。」傳到神又係神。

（本文原刊《文學客家》第11期 101.12出版）


（四縣腔）
徐貴榮教授 聲檔 — 白馬傳奇

▲BACK