大路關

【文、圖／鍾榮富／南臺科技大學應用英語系講座教授】

 

　　「大路關」係高樹鄉東南最南端的客家村落，屬於一个客家方言島，北部係平埔族（馬卡道族）个泰山，東部就係三地門鄉个排灣部落，南部同鶴佬个西瓜園（振興村）隔著隘寮溪，當地人喊這條河「南河」。南河對三地門繞到南勢（南華村）一路向北流，故所大路關西片都係水。可能就係恁哪，大路關人早時生活盡苦，但也可能就係恁哪，大路關使得保持蓋特別个客家腔。

　　大路關本來淨係一個莊頭，可惜在咸豐七年(1857)該年，洽風洽雨，落雨量特別大，引起山洪爆發，大水一下就呷大路關由東到西橫切做兩片，北邊一片平陽，多為沙礫之地，今本日安著廣福村。南片多樹林，村莊東南有一粒小山仔，故所莊頭分人安著「平頂」，正式个名就係廣興村。原本企啊在莊中央个石獅公，也在這擺大水中遭到淹沒，後來重建啊在廣福村南片个入口，就係客委會十二節慶中个石獅公。

　　早期，大路關人生活困苦，無水食。每擺缺水个時節，村長會派人打銅鑼，歸莊去喊大家出來上埤（前往三地門水源處，一路做溝圳引水到村上），水入莊內水溝仔後，家家戶戶愛準備水桶㧡水，儲放在水池裡肚。頭擺山歌有講「嫁郎莫嫁大路關，愛㧡水又愛行山，三餐鑊頭無米煮，出門剁樵又驚番。」可以反映大路關人个生活。大路關地方毋大，但係出了一个大作家鍾理和先生。鍾理和故居今還係蓋多人來遶料个景點。

　　日本時代末期，昭和初年，又有大路關人搬到高樹東北片个石岡上開墾，大家就喊這個所在「大路關寮」，今下屬於建興村个一部份。又有兜大路關人搬去大和（內埔東勢村）同大路關寮（內埔竹圍村）歇。雖然搬遷到今，已經有兩三代，但係這五个莊頭个客家人大部分都還講大陸關腔頭个客家話。

　　大路關个客家腔有三個特點。第一，「市，升，沉，食，識」同「四，新，尋，席，息」讀法相同。換句話講，「死」同「駛」共音，「升」同「新」共音，毋像苗栗話，也同美濃、內埔地區个客話無共樣。第二點，名詞結尾用[i](醫)，比如講，苗栗、內埔、美濃个「凳子，桌子，釘子」讀[den ne, zog ge, dang nge]，大路關音讀[den ni, zog gi, dang ngi]。第三點，大路關个陽平調愛變成陰平（第二聲愛變做第一聲），故所『時』本來同『人，來，銅』共調，都係第二聲，像『天時，日時，有時』，假使『時』後背有另外一个聲調，就愛改讀第一聲，親像「時間」「時時」「時水」（如端午節有「午時水」）「時候」「時節」「時局」等的「時」都愛改讀第一聲陰平調。這三個特點使大路關腔在六堆地區特別無共樣。


（四縣腔）
鍾榮富教授 聲檔 －大路關

▲BACK