客家，我家

【文、圖／許雲菁／國立中央大學客家語文暨社會科學學系客家政治經濟研究所碩二生】

 

　　天時還無定貼个三月，捱帶等決心同期待，該係捱第二擺來到客家學院，該日个日頭蓋箭，風蓋舒爽，喇喇个日頭、燒暖个微風；捱同自家講，這擺係最尾一擺个機會，捱一定愛達成願望！在客院个四樓，等待面試，捱看等中大湖，心肝肚全全係對未來个想法，捱想愛看等這靚妮妮个景色，好好在客家研究學術海中裡肚遶尞。

　　今這下，在這片个每一日，朝晨，捱攏係騎等腳踏車，穿過一片楓香樹林，涼涼个清風摸等捱个面，映到捱目珠裡背个係中大湖，樂線个鴨仔像在湖面項划船樣仔，幾暢樂！正經蓋喜歡在客家學院學習个日仔，景色靚到使得分捱心頭過開闊，今這下研究室窗門外背个油桐花當該落四月雪，開到蓋鬧。

　　該時節大四，捱連走帶飆个將學士帽擲向天頂，同大家講捱愛結束大學四年，前往下一个階段——研究所，第一擺對屋下肚徙出來，學習自家照顧自家，半大毋細了毋過還係對新環境，還過新个生活有息把仔緊張；也開始毋過接受家裡的經濟資源，麼个都愛計較，還記得該時節第一隻月就瘦了兩公斤有。

　　就算係恁仔，心肝肚嗄係蓋實在个！同房的朋友與同學每一擺互相分享零嗒仔同宵夜，正經蓋幸福，深深仔感受到「在屋下靠爺哀、出外靠朋友」；乜記得行入中大客家學院上第一節課，細細个教室當中，第一擺見面个同學目金金仔你看捱捱看你，無人想愛壞仔恬靜个空氣。在教授走入來該下，對等大家笑瞇瞇，親切又溫暖个同捱等講：「歡迎大家加入中大客家學院大家庭呀！」本來噹噹吊吊个一粒心肝，黏時就像有燒暖个空氣鑽落來，分捱覺著過安心，這乜打開了捱在客院研究个生涯。

　　這兩年个時光，咻一聲，蓋遽就會進入了尾聲，酸甜苦辣、汗水同目汁合到共下，捱蓋幸運可以跈著恁慶个同學共下，每一位教授乜攏係捱重要个貴人，像係屋下人共樣，總係蓋大方个分捱無共樣个指點，捱成長蓋多。第一年个捱蓋；像𤘅膣𤘅奓个細孲仔，麼个就毋知，淨知跈等學長學姊學習，一滴滴仔累積自家个經驗，就算做了無麼个好，大家也攏共下面對問題、解決問題、過後共下過自家！第二年開始漸漸換捱擎大旗，正知前一年經過个每一項事情對捱來說攏係蓋珍貴个營養！時光過蓋遽，兩年个時間漸漸仔到了最尾，毋過這一切个一切捱攏毋識石灰掞路──打白行，對客家學院个感情恁深，無論係共下辦活動个姊妹伴，抑係共下在研究室裡肚讀書熬夜趕報告个好同學，攏係捱人生當中蓋難忘个回憶！

　　同大學該四年相比，因為轉系，捱一直蓋無歸屬个感覺，但係客家學院分了捱淰淰个愛同關心；無論係老師或是同學，就算兩年恁短暫，一眨目又到了畢業季，心肚難免會有毋盼得同留戀，毋過這兜養分、經驗與磨練，正經分捱成長了蓋多！就算苦，也都行過來了，回憶起來攏係甜个！

　　這下還係會愐著大四該年个十一月个寒天，頭一擺面試、頭一擺走入客家學院，離開時落了一場大雨，同捱个心情共樣，大雨親像在同捱講：這場戰爭打到不罅好！要繼續為著下一場做準備！行出客家學院，捱斡過頭看了這棟大樓一眼，捱敨氣過後，捱頭犁犁、撐等遮仔；捱个白色襯衫、黑色皮鞋被雨水涿到溚潦，定定仔用捱个腳步捩學校一圈，因為捱毋盼得就恁仔歸屋下；這下，捱毋盼得離開中大客家學院。


（南四縣腔）
許雲菁　聲檔—客家，我家
〈客家，我家〉得獎感言

　　我對客家學院的感情之深切，雖然不是由散文三言兩語可以道盡的，短短兩年的時間，但能學到的事情，對我來說可以是滿出來了！從懵懂的碩一，由學長、姊及師長的經驗傳承與帶領，一點一滴的從陌生到熟悉，才剛上手了，轉眼間，變成我要擔當主導的位置，本來也很懷疑自己是否有能力，但一年累積的經歷，不知不覺的實力也堆疊了起來，連我自己都很訝異，慢慢的我成為學姊，將我自己的故事告訴學弟、妹們，在客院中酸甜苦辣的推疊，在這時，一切都值得了！

▲BACK