從未央歌想到中大湖

【文、圖／羅金珠／國立中央大學客家語文暨社會科學學系客家研究所碩士在職專班】

 

　　鹿橋个《未央歌》係當多後生人對大學个想望，小說肚个小童、藺燕梅、…這兜人，還有主角長透遶尞个陂塘脣，係捱細人仔時節對文學殿堂最浪漫个聯想。毋過，學文毋成學商業，文學个夢在考著台北商專過後就斷盡盡咧！無想著，在社會做頭路20零年過後，還有機會來到中央大學个大陂塘脣，圓著自家大學生个想望。

　　捱記得該當時，從中大个後尾門行到客家學院脣个大陂塘，松樹步道樹下个風，柔柔仔吹等面頰卵，心肝肚嗄無結無煞毋知前途會仰般？

　　「今下个選擇著無? 興蹀蹀仔考落來，會卒業無? …」中大湖項，天頂星仔个倒映，跈等水紋搖搖擺擺，下課過後，坐在陂塘脣个柳樹下發琢愕，四向角頭暗摸叮咚。

　　「奈得何無?」時間對膚身脣頭溜等走，捱耳角角仔去聽風帶來个信息，
　　捱聽著風挲過松樹沙沙滾个聲，斯像對捱講：「行下去吧！」，
　　在中大湖泅來泅去个魚仔乜探頭鼓勵：「行下去啦！毋使驚！」,
　　就連頭那頂囁囁㘝㘝个星仔也當像對捱講：「做落去就著咧 !」。

　　捱咬等牙根決意愛頭擂擂仔做下去个時節，中大湖本成醹醹浪漫个氣氛，黏時水落陂塘無蹤無跡。這量時，好得學校肚有盡緣投、又靚、又有知識、氣質過人个教授，肯細心細義指導摎同學之間開洋關懷个鼓勵，該種起起落落个心，斯像又看著日頭花箭入中大湖樣，一層一層金光囁亮个水花，就係希望个光芒。雖然講修業期間緊觸觸个腳步聲摎翻書聲，將浪漫元素个魂影，嚇到浪浪散。平常時上上下下个人乜罕得打嘴鼓，或者迷戀中大湖脣餳人个景色，毋過書籍肚个作者分捱當多客家个知識。該下摎古人談客家心、客家民俗、客家語言个本質、還摎佢兜講歸拖拉庫个客家笑科。講來乜有成滴仔古怪，笑科个本質就係娛樂人心个細點心，在該當時，仰會、仰會──── 仰會變到恁毋好笑呢？跌斷腳骨顛倒勇，

　　轉化、轉化、過轉化…

　　一站時間過忒，總算摎古人評好，佢兜乜已像知捱在該想麼个、愛麼个，斯像有上蒼个安排樣，渡等捱向前行，行出一條光明个路。

　　中大湖陪等捱行過該站無日無夜、緊張又過充實个日仔，捱長透在圖書館看書看到入文。看老古人言，感受先人个智慧摎幽默，一字一句記錄下來、吸收、思考、論述，定定仔一本《臺灣北部客家笑科研究》總算在教授个督促、指導、牽成之下出世咧！

　　一句：「恭喜你！你畢業咧！」

　　捱正經目汁會流下來，千言萬語，毋當一句：「承蒙教授！」來表示捱對學校、先生个感謝。

　　千工萬工好得有收成，該當時个心情，一時半刻無法度形容。記得該日帶等教授个恭賀聲同時駛等車仔出學校大門个時節，車肚客家廣播電台堵堵好放鳳飛飛《掌聲響起》个歌仔，忍毋核个目汁毋多知仔就流出來，歸路項目珠就濛線。

　　「無想著啊！無想著！」

　　辛苦打拚以後總算得著成功个代價。之前个汗流脈落、熬更守夜，還過烏頭毛換成白頭毛，正正經達成自家一生人个夙願啊 !

　　這下中大湖个風摎頭過共樣溫柔、陂塘肚个大白鵝共樣挷頸歌唱、有情人終成眷屬个倩影共樣喜氣洋洋、該熱情个松樹桍照常跈等唱歡迎个歌曲。捱行在路中央，心肝肚又共樣愐等未央歌个故事。希望中大湖脣个客家學院，還會有更多摎捱共樣想望个人，肯落來為客家打拼出更好个一片天。

　　卒業過後認為自家還有一隻責任。尤其在得著客委會个獎助金過後，自認自家需要將中央大學學著个知識、教授教个經驗摎客家學院个精神傳承下去。所以在國小个學堂肚、新楊平社區大學个教室肚、各社區个活動中心、區公所个辦公室裡肚，不論係老嫩大細、各種族群，甚至到安徒生故事書个翻譯、文學个創作、小小客家記者个導覽訓練，全部都係客家傳承服務个對象摎目標。

　　「先生，你上課還生趣喔！」
　　「這擺个客語認證，俚這班全數通過耶！」
　　這係沙鼻，乜係責任，更加係一種滿足。

　　「莫忘初衷」，客家學院陳主任秀琪教授三叮嚀四吩咐，這句話到今還在捱个心肝頭捩捩轉，毋敢添放忒。捱乜希望自家做得繼續在「客家」這條路行下去，捱知續下來定著會堵著當多困難。毋過，有恁多教授、恁多同學、恁多志同道合个朋友做伴，捱毋會驚，毋會孤栖。捱會時常想起「莫忘初衷」這句叮嚀，斯像捱永久記得中央大學个微風，該日分捱个支持摎鼓勵！

　　風共樣在中大湖脣柔柔仔吹等、陂塘肚个大白鵝照樣唱等落熟个弦律、歌詞係一首永遠唱毋煞个客家歌，不論行到哪量時，佢都歡迎大自家來到中大湖尞，摎佢共譜高唱客家个未央歌。


（海陸腔）
羅金珠　聲檔—從未央歌想到中大湖 〈從未央歌想到中大湖〉得獎感言
　　首先感謝評審團對「從未央歌想到中大湖」文章的支持，非常感謝之致。

　　筆者年輕時的夢想，在進入中大客家學院之後，更在畢業後一直不斷的實現。其中有淚水有感動、有激情也有失志、… 在人生半百的時光裡居然不斷地湧現，因此這次的得獎對筆者來說又是一次莫大的鼓勵。

　　筆者懷抱著這種肯定，除了傳承語言之外，也會將自己所學、所知的客家，奉獻到更大的領域及各種不同的範圍，讓更多人知道我所熱愛的客家。

　　紙短言長，在此，再次感謝評審單位，謝謝中大客家學院給筆者這個機會。感謝！再感謝！

▲BACK