平鎮忠恕堂曾屋傳揚客家

【文、圖∕徐貴榮∕國立中央大學客家語文暨社會科學學系兼任助理教授】

 

平鎮東勢庄，這下个建安里忠恕堂曾屋（圖1），非常有客家精神，傳揚客家。

（ 圖1：東勢「忠恕堂」曾屋公廳）
二十年前，就係民國八十七年个時節，曾屋公廳修整完成，祭祀公業後代子孫共同決定，中央祖堂本本放阿公婆牌，奉祀祖先，分大家隨時轉來祭拜。左片个橫屋規劃變影像館、會議室，壁項掛等自家曾屋歷代老祖公發展，徙來台灣个歷史路線圖，還有一張一張仔一年客家農村四季个生活相片。右手析个橫屋規劃做文物館，放等當多頭擺農村用過个耕田傢伙頭、絞索機、挨礱機（圖2）、大灶頭、八卦眠床、烳籮缽仔這兜展示分人看。盡重要个係佢兜還用兩三年个時間，拍一垤客家農家一年四季个「農村舊影風情」DVD影片，片長歸點鐘仔，完全用客家話發音介紹，十分難得。（圖3）

（圖2：曾屋文物館內个「挨礱」—舂米用个。）

（圖3：「農村舊影風情」DVD影片。）

大約乾隆二十五年个時節，廣東鎮平縣開基第十五世曾九健公，跈兩個阿哥九倫、九俊來到高雄瀰濃庄（今美濃）同人做工，發現美濃地區無地好開墾咧！兩三年後就同九俊哥上來桃澗堡南崁，經過霄裡，來到東勢庄開基，變成來台祖。九俊公無討，九健公討李氏降七個倈仔，名喊「七大房」，七大房經過艱辛个開墾，後代在這開枝散業，到今有250年个歷史吔。

一行入忠恕堂曾屋，就會試着一種無共樣个公廳，佢个公廳係像小型客家文物館樣仔，有管理人守管。左橫屋有影像館，右橫屋有文物館，陳列歷史、老時生活影像、頭擺農家用過个東西、還錄製DVD用客話錄音保留，毋但係保留佢曾屋个歷史，還傳揚客家，也時常分學校、團體做教學場所，實在功德無量。

2009年開始，還在阿公婆牌脣項放「姑婆牌」（圖4），打破傳統上無嫁抑係離婚轉來妹家个細妹仔做毋得上公廳神牌奉祀个舊觀念，實在係了不起、當有特色个公廳。

（圖4：公廳右角下个「姑婆牌」。）


（四縣腔）
徐貴榮教授 聲檔 —平鎮忠恕堂曾屋傳揚客家

▲BACK