開工个話

【文、圖／鍾榮富／南臺科技大學應用英語系講座教授】

 

四月裡有一擺去桃園參加中央大學召集个會議，結束以後，黃菊芳教授怕看著一个老年家，在黑暗个風中行路，偏偏倒倒，毋係係穩个樣仔，就感覺著衰過，生出可憐之心，提議開車送捱去台北車頭。

車上閒閒，兩儕天南地北，講東講西，話題總離毋開客家研究同客家話。捱已經行過多彩繽紛个世界，拍過萬種型式个欄杆，故所惦惦坐啊在該位，聽佢講萬花筒裡背个故事。故事有認識个人，有頭擺做過个事，也有新个經驗。加上佢講古个方式，有頭有尾，還有布景同動作，足滿好聽。講等講等，車子堵好轉一个大彎，對面个車燈直射入眼，一時看毋出路个方向，佢煞講佢愛出一種刊物，紹介台灣客家各種面項，各種鮮趣个人事務。

突然佢問捱，看捱使得幫佢寫兜短文，介紹台灣南部个客家風光、人物、新聞，或者人文歷史，讓北部个讀者多一份瞭解。每一篇文章，最好還愛用捱自家个腔頭來讀一遍。捱聽著這个建議，認為係蓋好个理念，值得做，也需要有人去做。當時，捱就答應下來。無想著時間過啊恁遽，無一久編者就來信催稿了。

頭那還空空，臨時愛想出主題，實在還係不容易。扣一下頭那，舂一下壁，捱思考一陣之後，感覺還係以南部客家个文化面項為主題，寫一系列相關个文章，每一篇差不多在800到1000字之間，大家看起來正毋會負擔太大。由於長年教書講大話，聲音早就漏風漏風，變哪沙沙个聲，情像老牛拖古車，伊伊唉唉个樣仔，希望讀者老爺能夠體諒。

第一篇愛同大家分享个係文化外圍个話題。頭頭擺，客家人門前都有魚塘。魚塘底背，有一隻細阿蚪同一尾細魚仔，佢等係好朋友。每日共下料，共下游來游去，無煩無惱，特別快樂。

漸漸仔，細阿蚪生出四隻腳，變啊一隻細蟈仔。下把下，佢會跳上魚塘，行去附近个草坪遶來遶去，看著各種花草，又靚又好看。落雨後，還會看著天弓，金囊囊仔，足滿靚。

每擺，細蟈仔對魚塘外背歸來，佢都會同細魚仔講故事，講佢在水外背看著个花花草草。細魚仔聽到盡鮮趣，盡想跈佢出去水外背看看哪，可惜一直無辦法做到。有一日，細魚仔看著細蟈仔又跳上去水外背了，佢就盡力跳出魚塘外背，結果細魚仔跳上去以後，囊發現佢無辦法行路，淨使得恬恬眠哪在草底背，緊喊：「救命！救命！」

等到細蟈仔愛歸魚塘个時節，佢囊看著死呀乾乾个係魚仔。


（四縣腔）
鍾榮富教授 聲檔 － 開工个話

▲BACK