講「分鳥仔屙着屎」

【文、圖／彭欽清／國立政治大學退休教授】

 

張祖基先生在《中華舊禮俗》第二集有按呢个紀錄：

讀國民學校該下，有一日同莊項个鄰舍伴仔在大禾埕項搞，𢫦𢫦風聽着阿月仔「啊」聲仔，續等伸手在厥頭那頂一摸，摸着一搭濕濕个東西，鼻啊了，臭臭。大家同佢看啊，原來係分鳥仔屙着屎。細人仔毋知頭天，相賽在該㖸佢，還七嘴八嘴同佢講，分鳥仔屙着屎會行衰運，害阿月仔嚇到噭等轉。
該臨暗仔愛食夜該下，有人在柵仔門該緊喊。捱同吾姆出去看啊，係木生伯姆同厥妹仔阿月仔。阿月仔着等爛衫、爛褲，還兜等一隻大碗公。木生伯姆講：「拜託分幾口飯分吾月仔食啊好無？」吾姆還吂等佢講煞，就喊捱遽遽去米楻項扡一撮米來，吩咐捱將米放在阿月仔个碗公肚項。佢兩子哀緊講恁仔細，緊行去隔壁繼續討。
捱問吾姆仰會恁呢呢？佢講，阿月仔怕係分鳥仔屙着屎。捱就同下晝發生个事情講畀聽。佢講：捱就知喔，老時人講分鳥仔屙着屎會行衰運，愛去化解。雖然佢這兜係大耕大種个人，乜愛從俗，無仰會盼得滿女仔去同人討食。

食夜該下，吾姆將頭下阿月仔兩子哀來討食个頭尾講分吾爸聽，喊佢同捱講仰會有這種俗。吾爸講，這俗係老祖公傳下來个，頭來尾去乜無幾多儕講得清楚。毋過，大體人總係會講麼人个麼人分鳥仔屙着屎，下後就幾衰幾衰仔。講到有手有腳，害人聽到心寒膽顫。故所，係講正經分鳥仔屙着屎，就愛遽遽去同佢化解忒。

盡先愛打扮到像乞食仔樣仔，著到爛爛擐擐，拿等爛碗公去同隔壁鄰舍討米。討轉來个米做毋得在灶下煮，愛在屋外背用石頭結灶仔，米放在爛鑊肚，拿屎摒仔、尿桶析這兜準樵燒來煮。煮好个飯先分分鳥仔屙着屎个人食，伸个別儕人乜做得食，食了講較毋會行衰運。盡尾，愛記得摎爛衫、爛褲、爛碗公、爛鑊仔這兜，總下拿去挑挑忒，恁呢，就做得同衰運化解忒。

吾爸講煞，續等問捱：你係分鳥仔屙着屎，你會怪怨鳥仔無？捱應佢講：會。佢嗄講：愛承蒙佢就承蒙毋掣哦，還去怪怨佢，實在冤枉佢。看𠊎挱無頭䌈，佢講：鳥仔屙一搭屎在人个頭那頂項，係愛同人講會有衰運到，愛煞煞去化解，佢係愛揬你知，毋係愛害你，大戇牯，了解無？

當時聽到呆呆，這下愐啊了，吾爸个講法毋係同聖嚴法師勸人面對困難愛「面對佢、處理佢、放下佢」，道理共樣共樣喺！


（四縣腔）
彭欽清教授 聲檔 － 講「分鳥仔屙着屎」

▲BACK