大山北月

【文圖∕薛常威∕國立中央大學客家語文暨社會科學學系在職專班碩士生】

 

「有妹仔毋好嫁到大山背，上崎堵嘴、下崎捋（註1）背。」這句客家諺語反映出新竹客庒橫山鄉大山背當地生活个艱難辛苦。頭擺个大山背確實一抺野（註2）荒地無人耕種，後生人正會有出外討食个感覺。毋過，吂到30歲个後生人莊凱詠在這位尋著做得創業个商機。


大山背頭過識有一間豐鄉國小 (1923-1983年)，2014年莊凱詠向橫山鄉公所承租下這間無人管理个小學，還摎「大山背」个「背」字拆做「大山北月」重新安名，象徵新生命个開始。

「大山北月」毋單淨係一間景觀餐廳，還用上課个桌凳摎板牌做布置，菜單也設計成考試卷个樣仔，希望帶等大家轉到國小个時節，校舍乜重新整理油漆。拖箱肚還放等幾下本細書，分大自家回想該當時學生時節偷偷仔看課外書个記憶。


「大山北月」有自家開發个產品，柑仔大福、手工餅仔、冰糖蜜菊摎柑仔燒燒包，餐廳裡肚乜放等一息仔當地小農生產个農產加工品，像味緒當好个茂谷柑。每年四月、五月除忒做得欣賞靚靚个油桐花之外，「大山北月」還會提供賞焰暗餐摎導覽。還摎在地个耕種人共下成立「大山背農民市集」，分旅行个人做得在這充滿芬多精个樹林步道肚散步、買著萋萋（註3）个青菜摎咖啡、在耕種人个果子園裡肚認識農作物摎體驗。

「大山北月」个食材，全部用原價摎當地个耕種人購買，定著無講降低價數來批人（註4）。佢兜尋著當地十種無共樣个柑仔，重新包裝做一隻禮盒，安做「十分桔利」个名，就恁樣提升柑仔在市場肚个價值。旅行个人見擺消費，都會直接或者間等𢯭手著當地个經濟摎農民。


在後生个莊凱詠身項，兜看著，無見奇定著愛落去大企業上班抑係成為公務人員，正係後生人个好頭路。在一間強強分人拂忒（註5）个舊學校，無麼魂影个山林旮旯角（註6），就靠等自家个煞猛打拼，還係做得成就自家个事業。莊凱詠從細到大都相信，「利他精神」做得創造出更大个價值。在成就自家个同時，乜做得摎其他人共有共好，同時又解決忒一兜社會問題，像人口外移老化、偏鄉教育以及小農生計…。


追求獲利个同時，同時解決著社會問題，這就係社會企業者个精神。在橫山鄉恁樣形个客家庄，俚發現裡肚有社會企業精神、有社會責任感个「大山北月」。

（海陸腔）
薛常威 聲檔 — 大山北月
註解：
1.捋：lodˋ：用手指順著輕摸過去。
2.一抺野：rhid mi rhaˋ：一整片。
3.萋萋：ciˋciˋ：很新鮮。
4.批人：piˋngin：佔人便宜。
5.拂忒：fidˋted：掉棄。
6.旮旯角：gag lag gog：偏僻的角落。

▲BACK