一粒細細个風飛沙

【文圖／張捷明／國立中央大學客家語文暨社會科學學系在職專班碩士生】

 

一陣風吹過河壩脣，一粒細細个風飛沙，升起一𥍉目就會落下个旅程。

這粒沙頂高歇一隻細細个細菌，佢有一隻細細个理想─想愛完成厥太、厥公還有厥爸吂完成个心願，一定愛遶透這粒沙頂高个天涯海角摎百岳名山。

毋怕慢只怕懶，細菌接等厥爸吂曾探過个路頭，佢煞猛行，毋多知又行過這粒沙頂高个千山萬水。

厥倈仔愐毋解，仰般好好个細菌毋做？仰般愛出來風吹日炙？

佢就從頭漸二講分明：「做佢大眾三千，𠊎淨知，做毋得平凡過一生。莫看細菌毋打眼，共樣做得學天地一沙鷗，生命中永遠有一隻高貴个目標，這係一代傳一代盡珍貴个道理。」

倈仔讚嘆：「啊！辣椒細細辣過薑，葛藤細細递過崗，人子細細志氣大，星仔細細滿天光。無想著恁（an）大仔个細菌，也能起恁（anˋ）大个願，當初立下這般雄心壯志者，算來係仰般个人呢？」

大細菌當沙鼻个應講：「該就係汝阿公个阿公啊─人人喊佢愚公......。」

又一陣風吹過河壩脣，細菌兩子爺續等緊行。這粒毋打眼、細細个風飛沙，隨風跌落地泥，又不停隨風升起另一段堅耐个旅程。


（四縣腔）
張捷明 聲檔 — 一粒細細个風飛沙

▲BACK