《中大湖个風》

【文圖／張捷明／國立中央大學客家語文暨社會科學學系在職專班碩士生】

 

自序（四縣腔）
桃園新舊兩隻移墾地區个故事

這本文學創作係𠊎研究論文个第一部分「出版」，寫一隻主題兩隻地域个故事，都摎移墾、水、客家族群語言有關。第一隻故事係寫清代桃園西片海脣大坵園庄个「閩/粵」、「河洛/客家」移民，從許厝港上岸開墾時節，因為水資源摎生存問題發生个摩擦乃至械鬥个故事。另一隻故事來到一甲子前，又乜係水資源生存問題―大漢溪上游个大嵙崁溪石門地峽愛起石門水庫所產生个移民，又退轉兩百年前大坵園海脣漢移民上岸个許厝港故事。桃園這一西一東兩隻地域、一舊一新兩隻時代个故事竟然有強烈个關聯，中大湖在這兩地中間由一條石門大圳做臍帶、客家學院在這歷史交會點通過盡新个修業辦法創作代論文做媒介，種種機緣交織催生矣這本書。

又因爭這係在研究客家語言、文字、文化、社會、經濟、政治个中央大學客家學院所寫，「學」當然就愛「用」，客語當然係這本書个第一語言，既然係客家學院，乜應該愛補加文學這著領域，故所頭到尾清一色用客語來創作書寫。毋使愁看毋識，做盡係漢字，其中盡重要个兩篇報導文學都有華文。

2015年，𠊎進入中央大學客家學院讀在職專班，想研究客家文史摎客語文學。照中央大學客家學院在職碩士專班學位104年度修業辦法規定，做得用文學創作代替論文，毋過愛先正式出版，並公開發表，再提出兩萬字小論陳述創作理念，正做得申請口考，故所催生矣這本《中大湖个風》，歸本都係四縣腔客語文，毋過毋係單一文體，這係實驗性个，包含小說、散文、新詩、兒少文學、報導文學，甚至山歌，主題性探討移墾、移民、族群、語言……問題。排版順序從虛構先，感性次之、到真實報導，來呈現𠊎所看、所想、所感个各種議題。

中央大學原本就係有名个理工大學，漸漸加入人文學系，平衡了硬拚拚个印象；客語運動後，又再成立客家學院，就更多元化。這客家學院歸棟新建築就起到一個換新裝个老陂塘脣，中大人將佢喊作中大湖，當靚，四季花草綠、浮鴨戲水春，係新人雙雙對對在春風岸脣取景翕幸福个好所在。毋過這本《中大湖个風》寫个無共樣，毋單淨春風，還有寒風摎颱風，就像封面該張變遷圖，該歷史色目係暗色个。

欲窮千里目，更上一層樓，𠊎時常上去學院樓頂看風景；頭那頂白雲蒼狗來來去去，春鴨腳下暗暗伐，看山毋係山，看水毋係水，春風遊過中大湖畔。𠊎從西北面个大海，看到東南大山，想著幾年來，看著、聽著這條軸線上个土地故事。

桃園台地係萬塘之鄉，中大在這萬塘之鄉中央，望向東南遠山係大溪復興，該位有大嵙崁溪，透過石門水庫水利設施，正成為歸隻桃園台地个水源頭，向西北看，係觀音大園沿海鄉鎮，係桃園大圳中壢大圳灌溉系統个水尾，中大湖老陂塘就在這水頭到水尾个半中央。𠊎企到這老陂塘脣个中大客家學院，吹等春夏秋冬四季各種个風，做文史調查學術研究，感受著桃園台地石門水庫水利措施完成前後為著珍貴如生命个水，在兩百年前摎五十年前所引發个沉重生命故事。毋過，𠊎毋係用論文工具解析研究，𠊎選擇無人行過个路，用文學創作寫出來。

𠊎毋驚人講「老來學吹笛，學得會來鬚就白。」年到一甲子，正轉到學生身分從頭拿起課本做研究。選修个第一堂課—黃菊芳老師个民間文學，一開頭就讀了一篇〈渡台悲歌〉：「勸君切莫過臺灣，台灣恰似㓾人山」；再讀一堂邱榮裕教授个移墾史，開頭又係一篇「閩粵械鬥」、「漳泉械鬥」，算來先民移墾台灣係為著麼个？仰般會留下恁多个遺憾？

讀了這兜幾百年來个歷史，到底俚兜有學著麼个教訓無？有較和挼、較進步無？讀忒歷史除忒道嘆，𠊎希望一百年後个子孫重寫一本新个台灣史，會記載這代台灣人所有个族群都共下打拼和和挼挼，台灣從此一片春光。

2015年𠊎將這道嘆，寫成一首客語新詩，題名〈時間个重量 -- 𠊎讀渡台悲歌〉，並投到104年教育部閩客語文學獎，得著該年个客語新詩首獎。

𠊎再回頭看這幾年間自家所經過个田野調查，這兜吂入中大前个興趣，下後就成為引領𠊎行入學院个機緣。從2012年熱天開始，同文史工作者莊華堂先生學習，第一擺正式注意著桃園觀音鄉个石門水庫移民新村，故所2012-2016就在觀音、大園个海脣分布个七只移民新村，摎石門水庫之間，來來回回幾下十擺，乜不斷个將調查結果，轉換成各種文學創作，得著各種文學獎肯定，希望分社會大眾看著這現代移民个問題。

在2014-2017期間，𠊎自家又再研究大園客家問題摎移墾調查，發現歷史檔案無明顯記載个閩粵械鬥摎四庄輪值，乜將調查結果轉換成文學創作投稿鍾肇政文學獎，再得著報導文學類首獎肯定，引起社會大眾个注意。看著這古代移民个問題，下後又用語言、歷史、文化各種面向探討，再用各種文類創作來表現，最後在106年閩客語文學獎得著小說、散文、新詩三隻獎項。

今𠊎將這幾年間，對兩隻新舊移民个相關田野調查資料，轉化為各種文類創作个成果，集合成一本專題式个文學創作成果摎大眾分享，除忒做為中大研究生生涯个成果，乜想成為客家文史研究轉為客語文學的先例。除忒做得供大學、研究所研究文史摎創作客語文學个範例，乜做得分母語老師、薪傳師、摎想接近客語文史个各界人士參考。

《中大湖个風》分做「石門水庫移民系列」、「大園移墾系列」共有十二篇，有報導文學、小說、散文、新詩、童話……等各種文類，其中九篇獲得各領域專家獎項肯定。

這本書係一本不拘研究形式个文學創作，除忒運用著邱榮裕教授个移墾學、黃菊芳老師个民間文學、徐貴榮教授个民間習俗，其外，因為係客語文學，故所書寫文字方面也運用著秀琪教授个田野調查與語言學研究方法，摎客語研究與語料分析、用詞同文化方面還用著羅肇錦前院長个客家文化專題摎客語詞彙與文化、還有王俐容客家族群與文化專題，張翰璧教授个社會科學研究方法、甚至陳定銘教授客家社會企業與社會網絡分析、甚至定量、定性分析都有用著兜。

承蒙前院長孫偉教授、現任院長周錦宏教授、系主任秀琪教授、班導師鍾國允教授、指導老師黃菊芳等等在修業辦法中，努力促成文學創作代論文个實現。

至於客語寫作个學習，𠊎係長期跈等前輩腳步行个，像徐貴榮教授、邱一帆、黃子堯、黃永達、江秀鳳、葉日松、張芳慈……等數十位民間个客語文學前輩，田野文史調查係小說家莊華堂指導，上山下水體會來个。𠊎單淨係創新題材摎文體、分自家從兒少文學領域再嘗試新个客語文寫作方向，煞猛開一條新路，將客語文創作風氣帶入學院，使得客家學院學位，除忒有嚴肅學術个一面，乜有軟性文學个另外一面。乜分客語文學除忒寫懷舊、寫童年、寫自家，還做得寫社會、歷史、關懷、天文、地理、學術……多面向無所不寫。

客語文學兩十年來，有人寫就有人研究，研究客語文學个論文乜不少：黃靖嵐學姊博論研究客語文學獎、左春香老師研究葉日松詩人、鍾振斌研究黃火廷小說人生、黃春芳老師研究客家安徒生張捷明……等。

用純客語來寫論文乜有人開了頭，𠊎所知有幾下位：鍾振斌老師、羅金珠學姊……等，證明客語毋單淨用在農業社會，乜上得現代个學術殿堂。

至於用客語文學創作代論文个，在中大客家學院這係第一本，可能乜係全國、甚至全世界个第一本，當然啦，聽講交大客家學案乜有人共樣恁煞猛積極籌備中，希望會跈等完成。

感謝邱榮裕教授賜序鼓勵，感謝大家相惜。寫論文𠊎係新來嫂頭一擺入灶下，可能寫來無盡好，單淨係拋磚引玉定定，還望大家莫細義，多多摎𠊎批評指導。

2018年5月 於中央大學客家學院碩專班中大湖脣

有興趣購書者請私訊筆者https://www.facebook.com/zong.ciapmin
或直接劃撥，帳號：19819384、戶名：張捷明、定價：400元

▲BACK