客話毋單淨用來溝通

【文／羅肇錦∕中央大學客家語文暨社會科學學系榮譽教授】

 

一般講著語言就認為「語言係溝通个工具」，較無想「語言也係文化个載體」，也就係講大家單淨想到實際功能面个問題，當少想著精神感情面个作用。從功能面來看當然語言係溝通个工具，像學英文係為著同英語系統个人溝通、學日文係為著同日本人溝通，全部係現實面个用途。但係學客話就做毋得恁樣想定定，因為弱勢語言溝通係基礎，學客話還有無共樣个目的，該就係客家个感情同客家个精神。也就係講「客話係客家文化个載體」，對客人來講客話係祖先留下來个文化，係代表客家个符號，代表客家个聲音，代表客家个尊嚴，代表客家个精神。

對一个弱勢語言來講，佢毋係時行又餳人學个語言，佢主要係阿爸阿姆教分子女同共族人溝通个語言，這族人有佢自家个傳統、自家个歷史、自家个宗教信仰、自家个生活型態。厥个語言同厥祖先个傳統歷史宗教信仰生活型態，有某一種無辦法分割个感請，無辦法豁忒个心肚个掛吊。故所客家話對客家人來講係厥个傳統、厥个歷史、厥个宗教信仰、厥个生活型態，假使客話消滅忒了，該就無客家傳統、無客家歷史、無客家文化了。可見客話係客家文化个載體，一息就走扣毋得。

國際上無共樣語言个兩隻國家，共下各个代表自家个國家發言該下，愛各人講各人个語言，再請翻譯官來翻譯溝通，做毋得代表人委屈自家講英文，還異會樣仔，在該展厥个英文。共樣个道理，假使客家話係國家語言了，該在國會殿堂客家地區選出个立法委員，就做得用客家話來代表客家族群發言。其他人聽毋識係厥事情，國會做得請翻譯來解決問題，這就係語言除忒工具以外，還有代表族群个符號，代表族群个尊嚴，毋係弱勢語言个人愛委屈自家梯梯突突講別人个話。

相同个道理，公部門場所包含車站醫院等，做無得講目前台灣个客人差毋多就會聽會講國語同學老話，故所車站醫院就毋使用客家來服務，這係反民主个做法，因為客話在公部門愛有服務个設備，毋係溝通个問題，係尊嚴个問題，係代表性个問題。故所客家有關个事務會議，從開始到結束，本來就愛用客話來溝通正著，毋使因為驚有人聽毋識，就改用國語抑係英文來講話。

總个來講，希望大家了解客話毋單淨係溝通个工具，還有佢當重要个意義係代表客家个文化，代表客家个符號，代表客家个尊嚴，做得公平、自由、公開个在溝通个場合來講客話。


（四縣腔）
羅肇錦教授 聲檔 — 客話毋單淨用來溝通

▲BACK