平鎮个關爺路

【文、圖∕徐貴榮∕國立中央大學客家語文暨社會科學學系兼任助理教授】

 

客家人對神明个稱呼，像對自家个阿爸阿姆共樣，除忒「伯公」、「天公」「伯婆」、「媽祖婆」、「觀音娘」以外，大部分就喊「爺」喊「哀」。像「神農大帝」喊「五穀爺」，「三官大帝」喊「三界爺」抑係「天神爺」，「三山國王」喊「王爺」，「關聖帝君」（關公）喊「關爺」，「石神」喊「石爺」抑係「石哀」，甚至「天公」也有人喊「天公爺」，分人試着當親个樣仔。

在桃園市平鎮有一條路，在平鎮高中脣項个德育路二段行下去，無幾遠仔過忒「興埔路」就安到「關爺北路」，毋單止有北路，還有東、西、南四路齊全，這四條路在台灣綠藻公司中壢工廠面前會合（圖1、2）。關爺東路向東到金陵路，關爺西路向西透到中豐路，關爺南路經過快速路、平東路，直直透到上南勢通天橋南勢里一鄰一搭仔。

實在還奇怪？仰會恁樣？頭擺筆者識想：這附近仔定著有一間關爺廟，毋過哪仔就尋交吔，尋無一間關爺廟，一直無法度理解，無關爺廟仰會安到關爺路？這隻問題一直到前幾年前寫平鎮市志个時節，在北勢新英里訪問一個九十空歲个老人家講正知。佢講：「頭擺在這四條路會合个地方，係一個平洋所在，逐年八月平安戲个時節，就在該搭仔舉辦。民間輪值个三界爺，各地神明、伯公，集揪請來臨時搭個寮仔項看戲，同庄民共下過隻平安年。

有一年下晝做戲，爐主點『關公過五關』个戲齣，鬧熱煎煎，台頂戲仔做到仰般餳人，台下看到仰般入神，好點點做關公个人斬將个時節，大力一蹬，關刀一拂，打橫晃啊去，嗄斬着戲棚楯，斬斷戲棚楯，戲棚塌啊下來，戲棚下看戲个人險險走就毋掣，一下間台頂台下个人嚇到眼呆呆，講係關爺顯靈。為着防止共樣事情毋好過再發生，經過爐主召集有關人員會議，決定從下年度開始，平安戲毋好過點同關爺有關个戲齣，為着紀念這擺關爺顯靈，在這分出个四條路，就安到關爺東、西、南、北路。」

事情過忒咧！百過年來，滄海桑田，物換星移，中壢工廠前，石門大圳中壢之渠在這穿過，四片哪仔就起起工廠，平安戲毋知哪久就無在這做吔，看毋出過去平洋个景致，看毋着過去八月平安戲个鬧熱吔！毋過往事還在老一輩个人口中流傳，到今關爺路穩穩還在，路上个車仔，一輛接一輛像砲射，射向東西南北。

（圖1：從德育路二段入關爺北路，在台灣綠藻中壢工廠前接關爺南路。）

（圖2：從快速路轉關爺南路，在中壢之渠前接關爺北路）


（四縣腔）
徐貴榮教授 聲檔 —平鎮个關爺路

▲BACK