講《中華舊禮俗》

【文、圖／彭欽清／國立政治大學退休教授】

 

《中華舊禮俗》這套書係廣東梅縣黃塘人張祖基寫个，一共有四本，做盡用客話寫。

最早發現這隻寶个係日本學者橋本萬太郎。為着愛寫客話研究个博士論文，佢去到瑞士个基督教巴色會書庫尋資料，看着這套書，暢到奈毋得，轉到日本同在日本一間大學教書个中壢客人戴國煇教授講起。戴教授建議日本崇正總會，在主辦1980年个第五屆世界客家懇親大會該下出版來義賣。厥建議有效，這套書正有好見天日。

1981年中原雜誌社發行影印本，異多圖書館有買，看个人加較多，毋過認真去研究个人較少。𠊎成十年前在政大民族所開一門客家文化研究專題个課，有幾下學期係上客家信仰同民俗，就用這套書做主要个教材。選修个學生有一半毋係客人，半揣半讀，儕儕就讀到當有興頭。其中有一個學生仔安做吳國聖，係holo客，盡煞猛。厥學期報告〈客家風物的百科事典〉，寫這套書係仰仔發現，還過紹介分析裡肚个內容。佢尋着盡多資料，寫來非常精彩，得着最高分。佢下後有修訂過，拿去參加客家研究論文比賽，得着頭名。

張祖基除忒有好記才，又當會收集整理資料，對民國17年開始寫到22年。歸套書用水筆字寫，當多个版刻文書、圖畫、商標，連拓印等等，都係原來个文件貼上去个。佢對民間傳說、習俗、信仰，像寫庚帖、查通書、寫疏文、畫符誥、作法收驚除煞這兜，都瞭解到非常深入，記錄到清清楚楚。莫怪巴色會會用“Hakka Chinesische Sitten und Gebräuche”（《客家中國傳統風俗》）做德文書名，意思係用客話寫有關中國風俗个書。

雖然張祖基係基督教徒，佢認為愛在一個信仰無共樣个地方傳教，定著愛先深入了解當地个俗、信仰同傳說，故所正會費恁大精神來寫這套書，教會也正會同佢看做寶樣仔收藏起來。

恁好个寶，𠊎成十年前去中央大學客家學院演講，識帶去分大家看，也分有興趣个人拿去影印。盡打爽个係有認真讀个無幾多儕，莫講去做研究。

講實在，做客家个頭路愛浪漫盡遽，逐年就桐花來桐花去，錢拿來打水漂仔，兩下半就無蹤無跡。歸百年以前張祖基先生記錄恁多恁好个寶，瑞士人同 囥到好好，日本人同 挖出來， 這代客人嗄同佢看做係草，張先生修養麼个較好，做鬼乜怕會毋甘願喔。


（四縣腔）
彭欽清教授 聲檔 — 講《中華舊禮俗》

▲BACK