阿婆買鏡

【文、圖／張捷明／國立中央大學客家語文暨社會科學學系在職專班碩士生】

 

阿婆去買鏡。賣鏡个細阿姐講：「老人家面皮打摺，也愛照鏡喔？」阿婆緊看鏡緊講：「汝講个係麼个話，六十年前𠊎斯靚過旦。」

阿婆擇好一面鏡，拿起照自家講：「這面鏡做來無好，鏡面無平色目毋靚，看著个面皮皺皺還會打摺。」

賣鏡个細阿姐也拿起鏡來看講：「阿婆還慶，知講這係過時个鏡，恁樣啦，一面十個銀，兩面五個銀，三面毋使錢，便宜賣啦！」

阿婆又換一面鏡講：「𠊎愛頭擺該種鏡，該央時个師傅，人又好、技術又慶，面面鏡毋使擇，細阿姐照起來逐隻都恁靚。」

賣鏡个細阿姐講：「吾公頭擺做鏡，乜毋識分後生阿姐嫌，隻隻都講實在靚。這兜鏡係吾公頭擺賣伸个鏡，想講風水輪流轉，時行還會到轉來，想看還有幾多利存好拈。」

阿婆換看第三面鏡講：「莫怪『火燒豬頭—熟面熟面』，緊看緊合眼，原來就係六十年前个時行貨，細阿妹，頭下汝仰般講？三面毋使錢？該就總下同汝貿起來。」

賣鏡个細阿姐講：「阿婆還慶，耳公恁利。毋過，一面鏡就做得照面容，三面鏡做麼个用？」阿婆拿起鏡仔講：「老來伴老來伴，老來孤栖愛尋伴，一面鏡兩面鏡，面面相對孤栖毋使驚。」

賣鏡个細阿姐講：「孤栖有子兒無就孫做伴。」阿婆拿出乾坤袋愛裝鏡講：「後生毋曉想，分人線（搧）動講麼个：『多子多冤愆，無子像神仙』，吂知老仔跌倒嗄無人牽，後生人！毋好老仔正知差喔！該下𠊎同汝講笑定定，恁好个鏡總下愛賣幾多錢？」

賣鏡个細阿姐襯手收鏡講：「吾公有交待，鏡賣識貨有緣人，毋使錢，做汝拿去用啦！」

阿婆收好鏡，心思行入鏡中，又轉到後生十七八。


（四縣腔）
張捷明 聲檔 — 阿婆買鏡

▲BACK