用毋和个兩隻客家字

【文／羅肇錦∕中央大學客家語文暨社會科學學系榮譽教授】

 

用客話寫文章个人，日勢日緊來緊熱烈，各項文章作品也緊來緊多，但係最麻煩个事情，還係用字个問題，愛取得大家个共識，還有異長个路，慢慢用慢慢修，正有辦法尋出的當合用个字，分大家來寫文章。為著毋合用愛修正个前提，下背𠊎先提出兩隻，目前異多人用來無麼的當个漢字來討論一下。

首先係「客家話」个「客」。客家个歷史一直就在南方遷遷徙徙，為著生存用「刀耕火種」个方式來生活，這族群个名稱，毋只跈等時代變化用無共樣个族名，抑跈等生活所在無共位改用無共樣个名稱，從唐代以來，一大堆个稱呼：像「和蠻」「和夷」「貉獠」「禾泥」「活聶」「哈尼」「山哈」「山客」「畲客」「輋客」「客人」「客家」等等，其中「和」「貉」「禾」「活」「哈」「客」六隻無共樣个漢字，全部係標音个漢字，厥意思係當時个「山仔」。

「和」「禾」「貉」「活」係早期个濁音字，變到後期變清音字，就同後期「哈」「客」共音，聲母係h-韻母係-a讀起來就同「哈」「客」差毋多。 來比較今晡日个瑤語、畲話、客話大部分無入聲字尾-p -t –k，既然無入聲字尾，該就自然會「哈」同「客」變共音，故所畲族自稱「山哈」就同客人自稱「山客」共樣共樣。毋過標音漢字「和」「禾」「貉」「活」「哈」用欸規千年，一般讀書人差毋多就知「和」「禾」「貉」「活」「哈」讀ha係「山仔」个借音字，毋過近百年來用「客」字以後，大家續毋知「客」係山仔个意思，顛倒用字面「主客」个客，講客人係中原來到南方「客而家焉」故所安到客家，還較尷尬个還有人講客人遷遷徙徙四處為家，像東方个吉普賽人。

可見漢字當多係借音字，毋好將標音字看成表意字，正毋會誤會，恅著「客」係「做客」个意思，懱到後代个人，愛花當多精神去查證，正會知「客」本來係「山仔」个意思。

第二係「夜合花」个「合」。客家地區，早期異多人在屋邊種夜合花，因為這種花个特色係暗晡頭開花又香又大蕊，故所安到「夜〇花」，台灣北部客講「夜學花」南部講「夜合花」，不管南北不管講「夜學」「夜合」，全係借「學、合」兩隻漢字來代音用，正確个字抑係講無字，還當值得大家研究。以𠊎來講，𠊎當懷疑係「和」「貉」「禾」「活」「哈」「客」等漢字个走音，「學」「合」本音讀ha本義係「山仔」，意思係客家地區个「夜山花」，恁樣就盡花理个花名。

無過這係𠊎暫時个看法，還吂敢講「著抑毋著」。𠊎在這愛提出來个係，用「夜合花」來代表這種花名，係用毋和个漢字。樣欸講呢？因為「夜合花」照字面意義來想，應當係暗晡頭合起來該花正著，暗餔頭合起來同大家所知「這種花个特色係暗晡頭開花又香又大蕊」堵堵相反，毋知這種花抑係無看過這種花个人就會恅著「夜合花」係暗晡頭合起來个花，同大家屋邊好種這種花，暗晡頭鼻厥香味个想法，就恅差代到至極了。

可見漢字當多係借音字，毋好將標音字看成表意字，正毋會誤會，恅著「合」係做「合起來」个意思，懱到毋知這種花抑係無看過這種花个人就會恅著「夜合花」係暗晡頭合起來个花。結果後代个人，愛花當多精神去查證，正會知「合」本來係「山仔」个意思，「夜合花」係暗晡頭開个花，毋係暗晡頭合起來个花。

以上「山客」「山哈」个「客」「哈」同「夜合花」「夜學花」个「合」「學」，這四隻輒用个漢字，全係借音代用个字，照字面个意思解釋就會「和毋著」，還當值得大家好好來研究。


（四縣腔）
羅肇錦教授 聲檔 — 用毋和个兩隻客家字

▲BACK