講客

【文、圖∕劉宛亭∕國立中央大學客家語文暨社會科學學系四年級】

 

打早，坐上駛位火車頭个公車，今晡日要同先生還有學姊共下去做採訪。來到臺北，烏陰烏陰个，心裡肚愐好等昨晡有看氣象報導，朝晨要出門時有同遮放進背包，沒等下落雨斯壞了！今晡日要訪問个主題係還我母語運動，來到梁教授个屋家，教授熱情个歡迎吾等，進去屋家肚架好錄影機，訪問斯開始了。

還我母語運動係一場1988年12月28日在臺北市舉行个大規模示威遊行，目的係希望讓客話使得在公開个媒體中使用。這背後个歷史係1949年臺灣戒嚴了後，政府推行國語運動，反對各種臺灣本土个語言，在學校禁止講客話、河洛話等臺灣本土語言，也限制這些方言在電影還有電視節目中出現。訪問過程當中，有問到梁教授在讀書个時節，咁有被國語運動个政策影響，教授講一開始還毋會恁嚴，到戒嚴五、六年了後，這个政策正緊來緊嚴。訪問到這位，讓𠊎想起往擺同阿公在打嘴鼓个時，𠊎有問過阿公厥等細漢讀書个時節，講客話咁正經會被人罰錢？佢講該時戴在庄下，其實毋會恁嚴，大漢了後正較嚴。

梁教授講厥在參加還我母語運動个時，要求要有客家電視台、寶島客家廣播電台、客家事務局、客家基金會還有關於客家文化節慶个客家文化節等，希望電視台製播客語節目，重建多元化、開放个新語言政策，教授講要建立制度性个規範，讓客家文化做得傳承下去。當初在推廣客家文化个時，教授厥也會到庄下演講，演講結束了後，正坐夜車轉臺北，第二日也共款到學校去上課。客家前輩辛苦个爭取，換來這滿个客家教育還有母語環境，接下來要仰脣傳承這个語言，係這个世代个等要特別重視个。

採訪結束了後，梁教授送吾等一人一本寶島客家廣播電台周年慶个特刊，使得收到恁有紀念性个書刊，實在當勞瀝。雖然在訪問个時，因為腔調个沒共款，有兜聽不識，毋過還係使得感受到梁教授對客家語言同文化个熱情，也當佩服當年為這个運動打拚个各位前輩。



（大埔腔）
劉宛亭 聲檔 － 講客

▲BACK