平鎮王屋

【文、圖∕徐貴榮∕國立中央大學客家語文暨社會科學學系兼任助理教授】

 

平鎮王屋，係講饒平客話个，有三桍人來台。一係13世王克師在雍正3（1725）年，帶等厥宗姪王仕福在淡水上陸，頭下碼到新莊，三年過後搬來南崁。降三個倈仔，大个仕泮、第二个仕種來安平鎮庄，在平德路起有「太原堂」公廳。第三个仕甲來南勢庄發展。二係叔伯兄弟王克照，又乜先到南崁，後人徙到大園、中壢、平鎮，後人又搬到楊梅、竹東、北埔這兜地方，係中壢、新坡、關西、沙坑、北埔、竹東王屋个來台祖。三係王廷仁，王克師个叔伯阿叔，康熙55年鹿港上陸，先到彰化，後來上來中壢、平鎮開墾，係王景賢个來台祖，目前這三桍家族个字輩排到年、興、派、別。佢兜原籍係饒平縣元歌都蓮塘社墩上鄉，這下係饒平縣新豐鎮墩上村，𠊎識在94同95兩年暑假到墩上村，記錄原鄉王姓家族个語音（圖1）。


（圖1：與墩上村王姓受訪者合影，後為土樓拆除後，磚造半圓形仿土樓。）

仕甲當增志，降三個倈仔，有二十一個孫仔，做得講子孫滿堂，財丁兩旺，後人徙到東勢庄、觀音、中壢、台北發展，故所，平鎮市南勢一搭仔个王姓家族，大體係王仕甲个後代。第三代三兄弟在咸豐初年新起宗祠，安到「植槐堂」，做為總家廟，經過幾擺个整修，都用客家寺廟个建築形式，大門屋頂兩對翹額，係一座小型个雙堂屋，門樓屋頂「財子壽」雙排面向內外，在國內當少看着（圖2）。


（圖2：93年12月修建完成後平鎮植槐堂門樓外觀，攝於94.5。）

王姓堂號一般安到「太原堂」，做麼个平鎮王屋特別安到「植槐堂」呢？根據族譜記載：「宋太祖太宗朝，王祜以直道，不容於時。歸而植三槐於庭，同人講：『吾子及孫必有位至三公者。』」無幾久，三個倈仔就做官，屋仔就安到「三槐堂」，故所這一派傳下个全部安到「三槐堂」，毋過平鎮南勢王屋安到「植槐堂」。植槐堂大門落去，正廳門前掛等「敦厚維風」个橫匾，係清朝咸豐9年由掛印總鎮「利勇巴圖魯」所送个，可見當年王屋个光彩。（圖3）


（圖3：93年12月修建完成後平鎮植槐堂正廳前掛等「敦厚維風」个橫匾，攝於94.5。）

客家人个公廳抑係住所，有服祀祖先抑係神明个廳下，在神桌下對中，一定會奉祀「龍神」，平鎮植槐堂王屋除忒有奉祀龍神以外，屋後化胎前對中還有一粒「龍石」，係北部客家公廳當少看着个，一般時節也無分人看，可能係客家「五星石」个留存。（圖4）


（圖4：南勢王屋植槐堂正廳後背个「龍石」，攝於99.3.7。）

平鎮王屋祖廟祭典，最特殊个還保留古代帝王宗廟用「尸」代祖宗个遺俗，就係在春秋兩祭个時節，三獻禮主祭過後，請兩個較高輩个老人家，分開坐到神桌前，由祭祀者敬酒，接等吃飯菜，打酒拳，互相對話，還過接受宗族个問話，時間差毋多有20分鐘到半點鐘，安到「食福酒」、「食饌」。生趣又合有古味，這係𠊎毋識看着个場景。（圖5）


（圖5：食福酒、食饌、打酒拳，攝於99.3.7。）

還有一般人過身做齋仔愛經過開鑼、成服、起鼓、點主、封釘這兜程序，王姓族人都講：「王姓不開鑼，饒平齋無點主」，又仰般呢？聽老人家講：「閻羅王升堂問案時定著愛開鑼，人間有姓王，地府有閻王，王不見王，故所王姓人家不開鑼。」另外無點主，聽講係宋真宗有一擺著便服出遊，看着一戶人家个對仔異欣賞，打探一下正知係才子王奇寫个，想愛拜佢作先生，王奇聽着遽遽寫上兩句感謝詩：「不拜春官作座主，親逢天子為門生」，故所王姓人家無點主，亡魂神主牌寫「神魂」毋寫「神王」。其實所有饒平人做齋仔都無點主，並不係王姓饒平人定定，可能還有其他故事。

饒平王姓人个客話，除忒「王」講ong53，「佢」講giu53以外，還有「毛籣」講「簝蕪」、「耳公」講「耳窟仔」、「鼻公」講「鼻窟仔」，「拜神」講「拜護」、「講話」講「講事」、「痛」講「疾」、「土地伯公」講「伯公」（bog2 gung11）、「阿伯公」講「伯公」（bog2 gung55）、「阿姆」喊「阿姐」，係毋係異生趣啊？

（四縣腔）
徐貴榮教授 聲檔 — 客家風情－平鎮王屋

▲BACK