低頭族

【文、圖／彭欽清／國立政治大學退休教授】

 

自從有智慧型手機仔以來，無論係行路抑係坐車仔，就會看着當多人頭磬磬仔在該看手機仔。英文就有「phubber」這隻新字，華語同佢翻譯做「低頭族」。

「phubber」這隻字係「phone」同「snub」兩隻字結合起來个。「phone」係電話， 「snub」係怠慢（對人失禮、毋周到）、冷落、毋搭（插）。英文字用-er結尾个，大部分係表示「仰仔个人」个意思。故所，「phubber」就係講：「頭磬磬仔顧看手機仔个訊息，全毋揈人个人」。

原在，講人行路毋揈人，係講一儕人行路總係頭臥臥仔。這下，講人行路顧看手機仔，係講佢行路總係頭磬磬仔。無論係行路頭臥臥仔抑係行路頭磬磬仔，就係毋去看人抑係看東西。行路頭臥臥仔，係對人毋對事；係講挑事毋搭人，有看高毋看低个意思；係態度个問題，表示挶屎、大傲、勢利。行路頭磬磬仔，係對事毋對人；係講專心味一項東西，無去注意着別項事情。

隨等科學進步，當多事情有智慧型手機仔好來處理，就利便加盡多。有了手機仔，就毋使下下都愛用着電腦、電視、收音機、翕相機、時錶仔；毋使買書、訂報紙、手電筒。這下人做得講無佢就像無手無腳樣仔，做毋成頭路。故所，無論係車仔頂、船仔頂、飛行機頂，抑係路項，盡多人就係頭磬磬仔看手機仔。本旦係後生人較會恁仔，下後連當多老人家乜變做低頭族。

有一駁仔寶可夢（pokemon）全世界就時行。哪就看得着，老嫩大細頭磬磬仔相賽在該尋寶。哪就有歸群歸群仔个人，尋寶尋到強強會發癲。無論係坐車仔、駛車仔、騎車仔，抑係行路，當多人淨顧頭磬磬仔捉寶，全毋管自家抑別人个生死。新聞講，該一駁仔車禍脫體多。用膝頭來想乜知仰會恁呢。

智慧型手機仔个功能異多，愛聯絡業務無就親戚朋友，抑係愛處理日常生活，就加盡方便。毋過，有一好，無兩好。這下人忒倚恃手機仔，日也用夜也用，好也用毋好也用，對目珠盡傷，使致到無論大人細子，當多人个目珠緊來緊花，甚至還有人因爭恁仔來目珠瞨忒。

水做得同船仔浮起來，也做得同船仔沉忒。手機仔乜共樣，用來著就係福氣，用來毋著該就真費氣。


（四縣腔）
彭欽清教授 聲檔 － 低頭族

▲BACK