車肚閒談

【文圖∕張瑞玲∕台中市東勢國小教師】

 

逐禮拜五下班，都愛趕緊出臺中去接兩個棧學寮个妹轉東勢。一掖車轉來成點鐘久，一上車，歸禮拜無見著面个兩姊妹，嘰嘰嘎嘎像伯勞嫲个樣斯搭起來咧！𠊎大體都聽厥等講無搭話，除了愛專心駛車个原因以外，聽兩個細阿妹搭嘴鼓、講笑談，試著也真生趣，所以當享受在車肚个這站時間。


（筆者上台接受客委會范佐銘副主委頒發獎座。）

大漢个妹嘴較屈，大體總係聽老妹在講，𠊎也無麼有應佢，一來佢一上車斯吱吱喳喳講無停，𠊎插話毋入，二來，若聽佢一上車斯講哪個同學仰脣；哪個先生這禮拜上麼个課；這禮拜在學校有麼个活動…，斯知佢這禮拜在學校過來真快活；若係講看著佢面臭臭、嘴嘟嘟，該都毋使問，定著這禮拜毋係考試考來毋好，無斯係又同哪個同學咭gudˋ著咧。

這日，像平常時共樣，坐啊落來又開始搭咧，等加添夾嘴个滿妹好恬恬停落來問𠊎：「媽！妳知無？吾同學竟然毋知gog31 gog31 gie+係麼个呢！」𠊎問佢：「啊你知無？」老妹都還吂應咧，該平常時無麼話个阿姊對嘴斯講：「該斯係恩等細漢該滿講个雞啊！該有麼个好問！」兩姊妹為這話題又開始嘰嘰嘎嘎講起來咧：「該臺中人毋單淨毋知gog31 gog31 gie+係麼个，連捽鉛筆个捽布厥等也聽毋識咧！」「係啊！該都恩對細漢時節斯用到大个東西，做麼會聽毋識？」大漢妹到尾講：「𠊎又想著咧！該恩長在講个确确，斯係裝東西个杯或者細箱係無？」𠊎講：「係啊！」「仰脣這确确吾同學也聽毋識！」

厥等恁泥講撇了後，正知，原來〜厥等自細漢斯講來真慣勢个語言，對別儕來講恁特殊啊！

（大埔腔）
張瑞玲 聲檔 — 車肚閒談
編者按：本文作者張瑞玲以「䀯老鼠」一文，榮獲106年教育部閩客語文學獎客家語散文教師組第二名。

▲BACK