算來禪宗六祖慧能係客人抑學老人

【文／羅肇錦／國立中央大學客家語文暨社會科學學系榮譽教授】

 

三十年前，𠊎在《國文天地》寫一篇短文，證明hok lo（學老）个漢字毋係河洛，也毋係福佬，還較毋係鶴佬，該愛樣仔正著呢？𠊎當時个答案係「貉獠」，也做得寫「獦獠」。𠊎理由當簡單，河洛客話讀ho lok同本來个發音hok lo入聲字愛在面前，河洛堵堵相反，入聲字放背尾，故所河洛毋著，當然也表示 hok lo人毋係中原來个。再過福佬兩隻字，單純係借用福建來个人安到福佬人，同本來个hok lo个音差當多，尤其用客話讀變fuk lo聽起來就天無恁遠个發音，仰會做得用福佬。顛倒企在共音个立場，鶴佬客話聽起來係hok lo完全正確，同𠊎後期建議採用早期客人民間用个學老較好，理由係「鶴佬」同「學老」共音，也就係標音的hok lo。但係不管河洛抑係福佬、鶴佬、學老全部係借漢字音鬥出來个，人講鬼生鬚人鬥个，無一隻係正確个漢字。

該央時𠊎堵堵在《六祖壇經》〈行由品第一〉看著弘忍講慧能「汝是嶺南人，又是貉獠，若為勘做佛？」慧能曰：「人雖有南北，佛性本無南北。」其中貉獠兩字做得讀hok lo，恁對潮州就係嶺南，嶺南今晡日主要係學老人歇个位所，故所𠊎當時斷定hok lo就係貉獠正合理。無過𠊎背尾更過看著《六祖壇經》又寫「能嚴父本貫范陽，左降流於嶺南，作新州百姓。」這位个新州係在今晡日个廣東新興縣，在肇慶府（包含肇慶高要四邑等地）附近，肇慶府在廣東西片，潮州府在廣東東片，兩府堵堵東西相對，可見六祖慧能係新興人抑係肇慶府人，同潮州人無關係。歷史項，嶺南地區不管係麼个族，就淨有廣府文化、潮州文化、客家文化三種，以唐朝新州个地理位置來講，係早期瑤族文化同壯族文化个位所，同潮州文化拉毋到邊，另外瑤族歷史研究學者，差毋多就講明清時期四會新興設有當多瑤官，設多瑤官表示當地當多瑤族人，慧能分厥師父五祖弘忍講係嶺南獦獠人，應當慧能就係當時个瑤族祖先所在地个人。

另外「獦獠」、「貉獠」个「獦貉」兩字音，同「客哈」字音唸hah hak當接近，獠字瑤族語讀lau係「人」个意思，合起來看「貉獠」、「獦獠」係客人个意思。因爭廣東畲族瑤族人背尾吸收當多官話了後，就變到客人，無去看瑤族歷史瑤族分布就毋會了解貉獠原來係嶺南瑤族人个祖先个稱呼。照恁仔聚總起來，慧能係當時个貉獠人，也係後期个瑤族人，近代个客人。

廣東潮州地區當多拜王公、拜三王公、拜三山國王，大概係盤瓠信仰一脈相承个轉化，王公就係狗頭王盤瓠，三王公就係盤瓠三个倈仔姓盤、姓藍、姓雷，背尾三个家姓代表三个祖先，加上山神救駕有功受封國王，就係今晡日客家人拜三山國王个歷史證據。潮州地區到明清時期，山區差毋多還係瑤畲族个根據地，六祖壇經講个嶺南「貉獠人」，就係瑤族畲族个祖先，毋係潮州人个祖先。

以上從貉獠个讀音，瑤族早期分布，後期客人分布，瑤畲客同盤瓠信仰个關係，可以了解𠊎早期認為个貉獠係潮州學老个講法係毋著个，愛貶轉來看，貉獠係嶺南瑤族畲族个祖先，也係後期客人个祖先正著。

（四縣腔）
羅肇錦教授 聲檔 － 算來禪宗六祖慧能係客人抑學老人

▲BACK