平鎮宋屋

【文、圖∕徐貴榮∕國立中央大學客家語文暨社會科學學系兼任助理教授】

 

一看着「屋」這隻字个地名，就知係客家庄，就像「新屋」共樣。姓宋人做得在這變到庄名，係因為厥家族在這開墾到當闊，當多田地，形成一隻庄頭，全台灣姓宋个人口大部分都集中到這位。

聽老人家講（註），佢兜來台祖20世宋來高公，在清乾隆8（1743）年，從祖居地廣東省嘉應州白渡鎮（梅縣），來到這廣興庄開基展業。第二年轉去故鄉，邀請共宗族个姪仔宋富麟、宋高麟兩兄弟共下來開墾。過後，宋姓其他宗親也相賽跈等來這開墾。因為廣興庄本來就有客人來開墾吔，故所佢兜就向這个西片發展，大約係這下个石門農田水利會到新光合纖公司西片一搭仔。《桃園縣志》51年版卷首拓殖篇也有寫「…霄裡、南興、廣興一帶，亦為粵人宋來高於民前168年（清乾隆9年）著手集佃開墾，其墾業後漸移至安平鎮之宋屋庄一帶；並創建八字圳，以利灌溉。」宋屋人開八字圳、伯公潭圳這兜水圳，擴大開墾範圍，增加農業生產，結果「廣興庄」个範圍慢慢仔變細，庄名漸漸仔就分「宋屋庄」取換吔！這下人講个「廣興庄」大約伸着「育達路」東片一搭仔。

「宋屋庄」還有一個當生趣个地方，也係同別人無共樣个所在，就係「房」這隻字。一般人个「房」，係厥祖公降幾多个倈仔傳下來，安到幾多房，第一個倈仔就安到「大房」，第二个倈仔就安到「二房」，恁樣安等下去，最細个安到「滿房」。一溜里來，大家就知宋屋跈等延平路一直下來，有四房、五房、六房个名，新竹客運在新光合纖廠同舊掬水軒廠之間還有「六房」个車牌（圖1），仰無大房、二房、三房呢？這問題當多人就毋了解。原來這「房」同別人个「房」無共樣，係因為宋來高公有四個倈仔，安到「四房」；宋富麟公有五個倈仔，安到「五房」；宋高麟公有六個倈仔，安到「六房」，恁樣流傳下來个。


圖1：「六房」个車牌。（107.2.22攝）

乾隆56（1791）年，新竹新埔義民廟做好，地方仕紳宋廷龍這兜人，為著逐年个義民爺生，本地人毋使疲爬極蹶，行到恁遠个新埔義民廟參拜，由宋廷龍主持創立義民廟，從新埔褒忠義民廟分香恭迎來奉祀，當時安到「義民亭」，祭祀區域包含中壢、平鎮、楊梅地方十三大庄个民眾。咸豐7（1857）年，由五房个第四房總理宋寶雲募捐增建前堂過兩廊，刻碑為記，改名安到「褒忠祠」，並且由宋氏家族負責管理。經過多擺整修，正變到今晡日个樣仔。

宋來高个四個倈仔，除忒一個轉大陸奉養阿姆以外，伸个三房在台灣傳下，厥宗祠原在當初來開基个地方廣興里，起有180年恁久，後來因為舊陋腐壞，分風搓吹橫，在日本時代昭和初年搬到這下新光路同廣豐街交接處起過。宋富麟、宋高麟後代子孫在開墾有成以後，在平鎮區延平路三段104巷過延平路三段314巷肚興建宋富麟公、宋高麟公祖堂，門額名安到「賦梅第」（圖2）。


圖2：宋富麟公「賦梅第」祖堂。（101.10.17攝）

（註）據桃園縣宋氏宗親會總幹事宋海清先生、宋富麟公祖堂管理員宋隆鎮先生口述。


（四縣腔）
徐貴榮教授 聲檔 — 客家風情－平鎮宋屋
編者按：本文作者徐貴榮教授以「秤頭」一文，榮獲106 年教育部閩客語文學獎客家語短篇小說社會組第二名。

▲BACK