過年較遽，過日仔較難

【文、圖／彭欽清／國立政治大學退休教授】

 

前一駁仔，大家正無閒洎杈過年，一𥍉目，又到吔正月半了，難怪人會講：「過年較遽，過日仔較難」。

照股票市場个行情來看，經濟像真好樣仔，毋過，正經有賺着錢个乜淨大頭家，普通百姓大體還係苦煎煎仔。正到天公生，當多東西就起價。盡屙巴个係衛生紙，講會起兩三成，害大家相賽囤貨。所有个大賣場同超級市場肚項个衛生紙賣到有錢買無貨，搣到世界出名个媒體，像英國廣播公司同紐約時報，都有報導這種怪現象。

有專家就拿網路流動量來分析，發現一開頭就係一家大賣場同一家報紙鑿空鬥榫。報紙講這間賣場个衛生紙哪久到哪久會打折，電視台又抄共條新聞，正會有恁多人走去買，來到這家買無好買，就走到別家去買。大賣場个衛生紙貨架仔項分人買到空空空个畫面，嚇着無去買个人，也走等去買。就恁仔，大家相賽去買，有人同佢安做“安屎之亂”，正經異笑科。

有人講，一開春就這起該起，今年个物價怕會起無停，錢會緊來緊薄，正經係「過年較遽，過日仔較難」。

會講「過年較遽」係有厥道理个，一入了年假，辦年貨、㓾頭牲、敬神、敬阿公婆、拜年、轉外家、出年假，年就過詐了。

過日仔就無共樣，大體人手面賺食，愛打早上班，到暗正有好轉，又還愛無閒三餐，屋下人平平安安就較得，係有麼个病痛，還愛使錢又宕時間。

今年係狗年，原在人講：「狗來富」。希望今年毋會這起該起，做得省幾多就係賺幾多，大家都有好日仔好過。


（四縣腔）
彭欽清教授 聲檔 － 過年較遽，過日仔較難

▲BACK