打粄

【文圖／李夢花／客語教師】

 

【筆者參加106年全國語文競賽—客家語字音字形，得到第六名。】

細時節，長透聽著收音機放个山歌：「打扮啊有三妹，打扮啊有三妹，打扮三妹，三妹過新年啊，na i ~~ io io du io…..。」緊話著該個三妹當會打粄。𠊎屋下這個三妹嬌尸撥撥，「講著做，甘願餓；講著有粄好食，毛辮斯走到直」，過年過節𢯭手阿姆㓾雞捋鴨、打粄敬神，就係𠊎這個做大姊儕。做到無閒直掣時節，心肝肚緊怪怨，係有該個當會「打粄个三妹」，毋知有幾好。

客家人蒔田割禾，挨粄打粄係盡自然个傳統，老人家長透講：「閒時閒節打粄來食—忒閒咧係無？」可見頭擺無閒个農業時代，愛等到過年過節正有打粄。

講著「粄」，就愛對米來講起，糯米較黏拿來炊甜粄、挼粄圓、做粢粑、䌈米粽、打粄粽。蓬萊米煮飯煮糜較好食，秥米煮飯糝糝，打菜頭粄、擦米篩目、炊水粄仔、炊發粄、做粄條較堵好。係講外型愛靚个紅粄、菜包、粄粽，該就愛糯米、秥米摻等破，還愛考慮新米舊米破个量無共樣，完全係經驗摎功夫，正會炊到又靚又好食。

在北埔到節慶，屋下就會打各種粄來敬神抑係請人客。清明打艾粄，訂婚結婚入新屋、起屋淋棚、冬節，就愛挼粄圓，係有做好事，還愛打粢粑來請人客。正月半打菜包，五月節摎七月半包粄粽、䌈米粽、䌈焿粽，六月割禾擦米篩目、九月十九做平安戲打紅粄，十月半做新丁粄（大紅粄）敬三官大帝（三界爺），過年炊甜粄、紅豆粄、鹹甜粄、發粄、菜頭粄，閒時還會炊兜粄條、水粄仔分細人仔食點心。

所以傳統个客家婦女，大鑊頂个籠床炊粄趕事，過年過節定著無閒直掣。

𠊎兜細人仔乜愛𢯭做事，去摘疊菜包个柚仔葉、清明前摘幼幼个艾來煠、洗粽葉、擦菜頭絲、還愛去排列仔挨米。過年炊粄阿姆个竹筱仔在旁脣放便便，毋分老弟老妹兼灶下，驚怕細人仔濫糝講話，發粄炊毋靚、甜粄會炊毋熟，明年个運勢會毋好。

【筆者今年炊个地豆甜粄已成功。】

阿姆炊菜頭粄𠊎就在灶下𢯭窿火，該香氣噴到歸屋間，口水強強會流下來咧！外背个老弟老妹緊喊：「菜頭粄炊好吂！炊好吂啦！」阿姆就應講：「大鑊吂滾、細鑊洛洛滾，有竹筱粄啦！愛食無？」一看啊著阿姆竹筱仔擎等愛拌人，相賽走到飛胗。炊好个粄吂放冷，毋使一晝邊乜毋使煎，兩下半就齕淨淨。所以過年菜頭粄定著愛炊兩床。

時代改變，愛食粄毋使等到年節，去賣粄个店仔買就有，屋下个大籠床收在棚頂，放幾下年囉！這下麵包店賣个「胖」（pangˋ）有千百種，已餳人買，毋過，𠊎還係好食粄毋好食「胖」（pangˋ）。轉外家成時還想愛打粄來食，𠊎定著愛教會屋下該個圖食个三妹，換佢打粄來分𠊎兜食。

（海陸腔）

李夢花 聲檔 — 打粄
編者按：本文作者李夢花所寫〈拈蝓螺〉、〈戲棚頂、戲棚下〉、〈竹笪達人〉、〈味道〉等四篇文章，入選「106年教育部客語朗讀稿徵文比賽」。

▲BACK