一隻蟻公同細鴨仔

【文／張捷明／國立中央大學客家語文暨社會科學學系在職專班碩士生】

 

油桐花森林个一隻蟻公，去河壩脣做事，看著草頭下有一粒鴨卵，鴨卵圓圓，蟻公斡到脣口過。

好恬恬「啵」一聲，蟻公著下驚，跈等一陣大地動，鴨卵必到兩析。蟻公企正一看，原來係鴨卵出子得似。

正暴啊出个細鴨子，頭探探仔緊看蟻公，還「阿姆！阿姆！」緊喊佢阿姆；細鴨子个天性，會將出世後看著个第一隻動物當做阿姆。

蟻公緊搖頭緊講：「毋係！毋係！𠊎無翼，𠊎毋係若姆。」細鴨子同兩隻翼胛閕開來撥兩下就講：「喔！恁仰喔！」毋過，佢想了一下又喊：「阿姆！阿姆！」

蟻公又緊搖頭緊講：「毋係！毋係！𠊎个嘴細細尖尖，汝个嘴扁扁圓圓，𠊎毋係若姆。」細鴨子摸一下嘴講：「喔！恁仰喔！」毋過，佢想了一下又喊：「阿姆！阿姆！」

蟻公又緊搖頭緊講：「毋係！毋係！吾腳趾無腳罅皮，毋會泅水，故所𠊎毋係若姆。」細鴨子低頭看腳趾，又頭顱臥起來看看河灞，又看等蟻公講：「喔！恁仰喔！」毋過，佢想了一下又喊：「阿姆！阿姆！」

蟻公無結無煞，毋知愛仰般解釋。好恬恬聽著「聒！聒！聒！」一隻鴨嫲去河灞肚尋食，正泅等轉來，蟻公遽遽指等鴨嫲講：「該正係若姆」。

細鴨子臥起頭看真仔，斷真無差，有翼胛、嘴扁扁圓圓、當大隻、會泅水。佢搖搖當當走等過去，一落河灞就會泅水；一出世就會泅水係鴨仔个天性。鴨嫲一看當歡喜，乜遽遽泅過來帶細鴨子，緊泅水緊唱歌，又同蟻公擛手講「恁仔細」；一出世就會唱歌乜係鴨仔个天性。

蟻公一隻手緊擛，一隻手緊撘心肝緊想：「呵！該哉正得，該哉正得！該哉厥姆恁遽轉來，係無，𠊎哪有恁多乳分佢食。下二擺係再過堵著這種事情，一定愛先同佢講：「𠊎係公个蟻公，毋會降細鴨子，故所𠊎毋係若姆。」

過了一下，蟻公當像想到麼个，自家噥噥噥噥緊講：「奇怪！𠊎食到恁大人矣，仰般毋曾看著嫲个蟻公生鴨子呢，𠊎愛轉去問吾姆正好。」


（四縣腔）
張捷明 聲檔 — 一隻蟻公同細鴨仔

▲BACK