鳳凰山个王公

【文圖／羅肇錦／中央大學客家語文暨社會科學學系榮譽教授】

 

今年（2018）正月二十六日到二月初三，中央大學客家學院博士班師生共下去廣東潮州鳳凰山同乳源瑤山做畲話勉語个田野調查，得到異多新證據，做得對客家民間信仰三山國王个來源，提出無共樣个講法。

這擺个田野調查，做得分兩個段落，前三日去潮州鳳凰縣了解當地畬話个現況同變化，後三日去乳源瑤族自治縣个瑤山調查當地勉語現況同變化。在這位先來講鳳凰山王公个看法，鳳凰山在潮州邊唇，同豐順兩合界，係各地畲族人共同認定个祖先發源所在。故所當地姓雷姓藍个人盡多，但係差毋多就毋會講畲族話了，像石鼔坪（其實係石牯正著）个位，歸村人差毋多就係姓雷，但係全村無分老嫩後生个大人細仔全部正會講潮州話同普通話定定、毋會講同客話差毋多个畲話了。

毋過該兜姓雷人，全部還知自家係畲族人，也知佢兜過年愛拜盤瓠祖圖（狗頭王圖像），因為雷姓係盤瓠傳說中盤藍雷鍾四姓之一，故所毋會毋記得自家係畲族，其他姓个畬族人，無在這四姓肚項，就變到客人了。故所在潮州，本來大部分係瑤畬人个根據地（早期按名輋），因為定居入籍，從盜賊亂民變良民，全面學習官話，慢慢仔就產生一種帶有畬瑤特色个廣東官話，就按到客話，慢慢仔除忒盤藍雷鍾四姓个人，也就講佢係中原下來个漢人。

講到這，從石鼓坪姓雷人毋會講客（畬話），但係全部知佢兜係畬族人，這種現象轉想台灣个客家，客話加一兩代就會無忒，係毋係也愛尋出客話以外个第二個特色來證明自家係客家人，比將講客人个姓全部用堂號來代表，就係一个當有意思个方式，像「張大炮」就按到「清河大炮」，「李天良」就按到「隴西天良」，該當然「羅肇錦」就按到「豫章肇錦」，恁樣，下二擺，子孫毋會講客話了，還做得看姓就知佢係客人。

另外，在鳳凰縣看著好多同盤瓠有關个廟，當地人有兜用盤古代表盤瓠，有兜喊盤瓠按到護王（瓠護同音），有兜喊盤瓠按到王公，瑤族人喊曾祖父（客家話阿太）也系王公，王公改用北方語法就轉到公王，這同風颱颱風、貓熊熊貓、蝦猴猴蝦个變化共樣。故所公王就係王公、就係祖公、就係阿太、就係護王、就係盤古、就係盤瓠，盤瓠係狗頭王，較毋好開喙，故所拜公王就轉化到拜盤瓠个三个倈仔，盤自能、藍光輝、雷巨佑，繼承王公變三王公，三王公到背尾又變成三個祖姓，變三個山神，傳說救駕有功，分宋王（也有講唐王明王就無傳講救元王清王）封國王，變到三山國王，故所潮州人盡多拜三山國王。

在潮州市人講潮州閩南話，但潮州有當多係瑤畲族人變來个學老人，故所潮州正會恁多公王廟三山國王廟，像韓江唇个鳳凰塔，名按到起鳳古廟，但係拜个還係三王公，也就係後期个三山國王，廟側角還有將軍同狗王，這同台灣十八王公廟當相像，演變个過程係本來拜盤瓠後期拜狗頭王畫像、再過就拜公王拜將軍同忠狗（忠勇王）。當地生活个百姓也稱呼緊變，從貉獠變畲瑤、變活聶，變山哈、變山客、變客家，有兜講白話个就變廣東人，有兜講潮州話个就變學老人（福佬人）。

總講這擺行一輪鳳凰山，得著盡多个客家信仰變化消息，客家同瑤族畬族个淵源同轉化，從盤瓠信仰變成拜祖先，拜三山國王、拜王公、拜忠勇王狗神。全部係一脈相承个歷史宗教，也係大潮州（包含梅州惠州潮州）客家淵源長流个真面目。




（四縣腔）
羅肇錦教授 聲檔 — 鳳凰山个王公

▲BACK