導覽六家民俗公園个感想

【文、圖／邱碧蓮／新屋國小客語教師】

 

這恁久來「浪漫台三線」个議題盡紅、盡鬧熱，也因為這原因，𠊎開始接觸客庄个文化導覽工作，本旦去到客家庄，可能斯感覺當有客家味定定，食兜客家粄、翕兜相片，從來乜毋識去研究這客庄个歷史摎文化，完全斯係一個觀光客个心態。

【為大陸交通大學學生解說問禮堂个由來。】

毋過，自從開始從事客語教學工作，𠊎个心態開始改變，有無共樣想法，開始想愛知還較多个客家文化摎其他客家有關个所有事物，通棚想愛清楚了解，從語言、文字、到風俗習慣，所有摎「客家」有關个活動只愛有閒𠊎盡量參加，參加這兜活動熟識當多个客家專家，越深入就試著自家老底所認知个客家實在有限。

在六家國小教客語時，六家國小个校長佇竹北社會大學有開一個「客庄導覽」个課程，當時無想恁多，斯想這摎「客家」有關，就報名參加，從初階、進階、高階一路上下來，學著盡多本來無清楚个，加上自家這幾年來對客家知識个累積，緊上緊有興趣，這下𠊎主要導覽个位所係六家地區个「客家民俗公園」，「客家民俗公園」在交通大學客家學院肚，選擇這個地方个原因有：

1.本身這下在交通大學讀研究所

2.六家本旦係饒平客庄（基於自家饒平妹仔个私心）

【全國童軍大露營在竹北六家民俗公園大會師。】

接觸這導覽工作，分𠊎䀴（注1）客庄有無同樣个想法摎角度，為著還較精采个導覽解說，拜訪民俗公園林屋个主人林光華先生，進一步了解林屋從長山來台个過程，這部分摎在學校教高年生个社會課程睹好相通，結合串成一個完整个故事，為著愛將客家建築清楚紹介，去查資料、翻竹北開墾个歷史、䀴新竹縣史甚至連民俗植物乜研究。

【接受自行車協會頒贈个感謝狀。】

主要个目的係：愛將正確个訊息分來尞个人客、分來民俗公園遊尞个人，聽著係正確个歷史文化，一路行來𠊎感覺自家个學問、知識有最大累積，算來係最大个贏家，所得到、學到个絕對係課本無个。𠊎十分愛這文化導覽个工作，愛客家毋使講恁多，用實際這个行動斯著了，客家文化个傳承𠊎會一直做下去，歡迎大家有閒來竹北六家饒平客庄尞，等待你兜个大駕光臨。


（饒平腔）
邱碧蓮聲檔 － 導覽六家民俗公園个感想

注1：䀴〔ngiang53〕，直視。玉篇‧目部：「䀴，直視。」廣韻‧上聲‧迥韻：「䀴，直視貌也。」

▲BACK