麒麟賜福安平鎮

【文、圖∕徐貴榮∕國立中央大學客家語文暨社會科學學系兼任助理教授】

 

    「安平鎮」，就係這下个桃園市「平鎮區」。全區除忒姓莊人大部分係學老人以外，其他各姓總下係客人，有講四縣、海陸、饒平，還有詔安个，做得講係一個純客家庄。
    聽講早期來開發个先民，這一搭該一搭，四四散散，人漸漸多以後，在這平野野个所在，用方位來安名，安到東勢、西勢、南勢、北勢。北部因為係廣東客人來開墾，故所安到廣興庄（後來變宋屋庄）；還有高岡頂有兩隻大陂塘个地方，安到雙連陂庄。

    在這西勢所在，北片縱貫道路從埔心下來个搭仔，係來往新竹台北个官路所在，當時還係荒埔，先民為着愛守護過路个行人、貨物安全，搭一隻寮仔派隘丁上去守等，安到「掌路寮」。又聽講西勢南片大坑缺，鬼怪長透出入，危害地方，幾下年地方人士又長透發病仔，死忒異多。想起來怕係同「西」這字有關，就起三官大帝廟保護地方，正經喔！地方慢慢仔就無病！平平安安，無鬼無怪咧！變到「安平鎮」！

    早期个「安平鎮庄」，在清朝末年，還係一個細細仔个庄頭，大約在這下个平鎮、鎮興兩里一搭仔。明治34（1901）年，設桃仔園廳時節，本庄增加管轄南勢、山仔頂、東勢、社仔這四庄變到較大个「安平鎮庄」。到大正9（1920）年，又合併宋屋、雙連坡、北勢三庄，就係民間所講个「八保庄」。因爭同台南个「安平鎮」共名，故所分政府改到「平鎮庄」，變到今晡日个地名。

    光復以後，平鎮庄改到平鎮鄉，毋過後來工商發展當遽，民國81年，直接由鄉升格到縣轄市。民國100年个時節，當時个市長陳萬德，續編平鎮市志，由退休校長吳家勳先生擔任主編，平鎮市文化委員會討論講「平鎮个地理形投，南北長，略略仔大過東西闊，近近仔看、遠遠看就當像頭擺个動物麒麟，頭那向西（圖1）。麒麟係大家公認个吉祥物，像麒麟送子、麒麟獻瑞、麒麟賜福，提議本市用麒麟做標示、圖騰。」既然恁樣，就一致建議通過，「麒麟賜福安平鎮」好啦！

圖1：平鎮地形圖（取自原平鎮市公所網站）

    平鎮係一個純客家農村變到現代都市形式个，到今哪仔就還看得着闊野野个禾田，一座一座仔百齡年个老伙房屋（圖2），都市毋使綠化，本身就係綠化个都市。還有乙未戰爭，日本人到台灣，來到平鎮第一擺堵着抵抗，係客人，胡老錦帶領厥庄人同日本人相㓾，輸忒留下來个八角塘。
圖2：柑仔園王屋（100.01.10攝影）

    平鎮做得講係傳統同現代交織，人文同科技融合，工業同商業發展个都市，企到生淰淰布袋蓮个八角塘（圖3），懷念頭擺，愐想歷史，翻頭看啊現時，敬請麒麟賜福，賜福分這下个安平鎮，都市愛發展，客家愛延續。

圖3：八角塘（99.05.25攝影）


（四縣腔）
徐貴榮教授 聲檔 — 麒麟賜福安平鎮

▲BACK