轉年

【文、圖／彭欽清／國立政治大學退休教授】

 

    客話「轉年」這隻詞盡有厥特色，意思係講出外莊个人轉屋下過年。其他族群个人盡少恁樣講。客人會有這種講法，應該係同一溜里來客人旦旦都出外莊打拚有關。

    就拿清朝大陸个客人來講，近个去到潮州、汕頭，無就香港、廣州來讀書抑係食頭路；遠个就走到台灣無就南洋，愛轉屋下一擺無恁該，大體仔會等到年正轉。

    𠊎到七八歲該下，一屋下人還歇共下，對麼个係「轉年」還吂異知。毋過，鄰舍有盡多大人去大山肚做山場个事，入年假邊仔，就陸陸續續會有人㧡㧡擔擔轉年。細人仔會企在大路脣項等等，遠遠看啊着屋下人轉，就遽遽走等去𢯭接東西。

    等𠊎十空歲仔，吾爸同兩個阿哥出外莊食頭路，愛過年過節正有轉，該下交通毋利便，路頭又遠，等轉到屋，大體仔係臨暗頭。入年假邊仔，𠊎也會走去大路脣項看吾爸同吾哥轉年吂。下擺仔連等幾下日無等着，會心焦，等到隔遠看着吾爸抑吾哥該下，先大聲喊吾姆知，正走等去𢯭擐包袱仔。

    大學畢業，輪着𠊎出外莊做事，食公家飯，無到年三夜四無好轉，吾姆會講，佢逐日在該頭望望仔緊看滿子有轉吂，等𠊎討了餔娘降有倈仔，佢還較頭勾勾仔望等𠊎較早兜仔帶等一家人轉。

    𠊎去美國讀書頭尾兩年，第一擺無轉年，吾餔娘在台北帶等吾倈仔轉去過年。年初一𠊎打電話轉去分老人家，吾姆講吾爸出去拜年了，大家都異順序，喊𠊎毋使愁慮，好煞煞同論文寫忒。無幾久仔，收着吾餔娘寄來个相片。有一張係吾姆在禾埕項教吾倈仔揤蘿蔔乾。𠊎影着大門項無貼門紅同春聯，寫信仔問吾餔娘，佢講係吂過年該下翕个。等𠊎同論文趕忒拿着碩士學位轉來，正知吾爸在頭年个雙十節𢫦𢫦風過身。吾姆喊吾餔娘毋好同𠊎講，驚會影響着吾學業，等𠊎讀忒轉來，佢正同𠊎講分明。

    這下，老人家無在了，伸一個阿哥在莊下，老屋侄仔歇，𠊎逐年還係轉去過年，敬天公敬阿公婆，同親戚坐尞。𠊎這綱仔人，還有好轉年个怕毋係異多，愐起來，𠊎真滿足了。


（四線腔）
彭欽清教授 聲檔 － 轉年

▲BACK