臺灣客家卅年个風雲

【文／羅肇錦／中央大學客家語文暨社會科學學系榮譽教授】

 

羅肇錦榮譽教授主題演講：「台灣客家卅年的風雲」

一、緒言
客家運動爭取个係客家文化傳揚下去个權益，也就係客家文化个本質愛受大眾个認可，恁仔客家人正有辦法在台灣安身立命，子子孫孫。故所搶救客家文化第一重要个係了解客家文化个本質。

客家文化个本質係麼个？係客家本身同人無共樣个東西，愛好好研究厥个質化个獨特性，係客家本身特別个，也就係「唯我如此」个內涵。其他一般人生活中个經濟（經邦濟世）要求係研究量化个普遍性，該兜東西係大家「共襄盛舉」就好，毋使客家人特別去加花精神。

文化（culture）本質係精神个、獨特个、內在个、質變个、歷時个、永恆个。故所客家文化研究盡重要个愛對1.語言2.文學3.歷史4.宗教5.民俗6.信仰7.民族性 8.意識，來入手研究，再將研究結果提供分行政單位，照恁樣个路線來進行。

客家文化運動路線，三十年來所進行个工作，大概可分四階段來看：

（一） 潛龍勿用 → 客家運動之前（1988以前）：客家意識个凝聚
（二） 見龍在田 → 前十年（1988～1998）：客家文化个定位
（三） 終日乾乾 → 二十年（1998～2008）：客家文化个推展
（四） 或躍在淵 → 近十年（2008～2018）：客家知識个建構

二、客家意識个凝聚：潛龍勿用 → 客家運動之前（1988以前）
當時客家人不敢在公共場所講客話，說客話會引來側目當見笑。認為客話無辦法書寫，當多人還懷疑客話有字嗎？學校不准說方言，廣播電視無客語節目。當時台灣人只有本省外省之別，而本省人指的是閩南人，一般人不知道有客家人。而語言方面，只有國語、台語、番語之別，一般人不知道有客家話。

三、客家文化的定位：見龍在田 → 初十年（1988～1998）
開始將族群語言分隔開來，台灣語言有國語／閩南語／客家語／原住民語（之前稱高山語），四種語言族群一律平等，都有使用發展傳承个權利。故所開始在學校成立客家社、在社區教唱客家歌謠，地方客家話研究團體開始進行字典編纂。還有地下客家廣播電台設台開播，社會人士鼓勵推動屋家教子弟客家話，客家戲曲團推出改良戲，演出戲齣，特別表現山歌同客家話。最難得个係電視開播客家節目，雖然淨台視播出一日半點鐘个客家文化節目，但係電視有客家節目，係客家文化定位當重要个過程。

四、客家文化个推展：終日乾乾 → 二十年（1998～2008）
第二個十年，客家文化定位以後，開始客家文化个推展，像現代客語流行歌曲創作興起，學校開始實施一週一小時的母語教學，中廣調頻網客語海外廣播，教育廣播台、寶島電台客語節目漸漸增加。最代表性个係2003年，客家委員會成立，經過各方努力爭取增加客家電視播出頻道，大學成立客家學院同客家研究中心。接下來學術研究學會相續成立，像台灣客家語文學會，台灣客家研究學會，成立以後對客家文化研究貢獻出難得个成果◦

五、客家知識个建構：或躍在淵 → 三十年（2008～2018）
近十年在客委會及教育部煞猛个推動下，專心對客家各項知識體系做一系列个建構。像公共服務客語傳播个設立。各縣市成立客家事務局，全面推動客語服務。客委會辦理客語認證考試，推展客語生活學校。教育部也辦理客語朗讀演講形音義書寫比賽、編客語常用詞典、編客語教學課本（從一到九年各六腔五十四本加教學指引共一百零八冊）。另外成立客家戲曲學校，訓練演唱專才，輔導多校成立客家文創產業相關系所。成立客家電視台，全面推出以客家話為主體个電視節目、成立講客廣播電台，投入客家話專業推廣客家文化个行列。

六、結語：寄望飛龍在天 → 期望个未來（2018～）
總合客家運動三十年以來，前十年以文化為主題，積極搶救語言、戲曲、歌謠、音樂、教育、宗教信仰，但係除忒語言以外，都還吂成立研究所來做還較深入研究。中間十年，積極推動各項文化語言个建設，成果有還算豐富，可惜忒偏重經濟（經邦濟世），無特別重視本質，係使人擔心个所在。像十二庄節慶个成果，無特別个客家特色，已多人講，這就係吂討論清楚就愕愕然訂出各項推動補助，變成鬧熱有餘文化不足。又像客家日个選定、客家桐花等代表客家符號个推展，同客家本質都有一大段距離。真希望沉浸式教學或母語實驗學校个推動，做得積極擔任搶救母語个任務，恁樣个運動，正做得得著盡長遠个迴響。


「客家的形成與發展：台灣與新馬的比較」國際學術研討會合照


（四縣腔）
羅肇錦教授 聲檔 — 臺灣客家卅年个風雲

▲BACK