客人个狗頭崇拜

【文／羅肇錦／中央大學客家語文暨社會科學學系榮譽教授】

 

客家人過年過節，頭拜尾拜，拜多拜少，拜來拜去，都還係拜祖先為中心。勘著有祖先以外个神，抑係取人做對象，像伯公係在世為人服務，地方人感心，就拜佢做土地神，過像義民爺，為地方犧牲，無人收承，故所大家拜佢，係人變鬼鬼變神个崇拜過程。連客家前身畲族人拜个狗頭王，抑係狗圖騰，全係拜人歷史个過程。

狗頭王个傳說故事，最早在干寶个《搜神記》、應劭《風俗通義》、范曄个《後漢書．南蠻西南夷列傳》、張華个《博物志》等等古書底肚，都有記載。到三國時代徐整个《三五歷紀》，也收集部分南方少數民族个「盤瓠、盤古」傳說，背尾「盤瓠」就變成開天闢地个「盤古」，填補原始歷史个空白，成為中華文化歷史个共同祖先，盤古開天。

盤瓠个故事根據係恁樣講。後漢書南蠻傳，恁樣講：「高辛氏有畜犬曰盤瓠，啣犬戎將軍首詣闕下，帝妻之以女，入南山，其後號曰蠻夷，自長沙武陵至交趾咸稱焉。」這肚項所講个南蠻其實就係客畲瑤个祖先，後來凡係講著瑤族歷史或畲客信仰，定著會提到關於「盤瓠」个傳說。故事肚還會提著盤古有三个倈仔盤、藍、雷過姓鍾个婿郎，故所後期畲族人就用盤藍雷鍾四个姓做代表。

本本歇著梅州、潮州、汀州、漳州个瑤輋客畲，明清以來，因為定居入籍，山賊變良民，接受王化儒化，慢慢放棄盤瓠信仰，變成今晡日个客家。這都客人毋單只無拜狗頭王盤古，還食狗肉食到咣咣滾，抑無知自家祖先係拜盤瓠的南方民族。唯一還看得到个現象係客家人拜祖先比別个族群還較虔誠，可能就係盤瓠祖先崇拜个轉化。

在台灣早期從汀州漳州來个人，異多還保留拜狗頭个傳統，應當就係搬來台灣架下還吂講自家係麼該人，用拜狗頭王來保護鄉民。像臺北縣石門的「十八王公廟」、北港「義犬將軍」、臺中縣大里「七將軍廟」个犬神、南投草屯兩間「七將軍廟」傳奇、嘉義「忠義十九公廟」个靈犬信仰等等。其中盡有名个係石門十八王公廟，去拜个人講暗晡頭去最靈，彩卷明牌最準，該係早期拜狗頭驚人看到，用暗晡頭偷偷仔拜留下來个俗。浮雲的《中國風土志叢刊》記載浙南處州一帶畲族人祭祖講：「畲客祭祖，人趨賀之，相傳夜半人靜，畲客取木刻狗頭，置之几上，羅拜之。移時，依然什襲珍藏，即所謂祭祖也。」又講「狗頭即盤瓠像，為畲客之鼻祖，羞為人見，故祭時必在深夜，屏去旁人狎者假為寐況，竊窺之始見狗頭。」可見畲族人清朝時代拜狗頭就驚人看著，故所石門練姓人本來係武平徙來个畲族人，也係拜狗頭王驚人知个表現。恁堵好其它大里、草屯、北港、嘉義、該兜拜義犬將軍个地方，全部係汀州、漳州來台，變學老客个所在，也就係畲族人變客人个證明。大陸學者近年（1997）調查到梅縣水車鎮小桑村有公王廟（蕭文評）、平遠長田鄉石角村有盤古公王廟（謝梅興），全部做得證明客家人係早期拜盤古公王（狗頭王），後期正改拜阿公婆。

在臺灣，假使你係姓鍾抑係姓彭姓藍个人，差毋多都分人認定係客家人。做麼个會恁仔呢？這係因為鍾、彭、藍姓係畲族盤古傳說中盤、藍、雷、鍾四個姓轉化過來个。其中盤姓轉彭姓，做得從台灣少數姓盤个人（如陸河遷來臺灣新竹湖口新豐的盤姓）祖先傳下做毋得同姓彭个人結親（臺灣彭姓宗族也都來自陸河），可見，彭姓就是盤姓，客就係畲，盤古就係盤瓠，盤瓠就係狗頭王，狗王歌就係高皇歌，客人就係瑤輋客畬。


（四縣腔）
羅肇錦教授 聲檔 — 客人个狗頭崇拜

▲BACK