平鎮葉屋

【文圖∕徐貴榮∕國立中央大學客家語文暨社會科學學系兼任助理教授】

 

「平鎮葉屋」（註），就係一般人講个「東勢葉屋」，在66快速道路金陵路交流道下來，到平東路往南勢這片斡無幾遠个北片巷仔肚。係講坐車仔，就在快速道路頂就清清楚楚看得着這棟像唐朝宮殿式，當派頭、當靚个巍峨建築。
東勢葉屋个開基祖15世葉奕明公，可能係客家盡早來桃園開發个。葉奕明本來係廣東陸豐縣螺溪鎮打武个人，聽講當年滿清政府愛捉這兜打武个人，佢為着避亂，兩十歲仔自家一儕人走到澎湖，經過十過年以後，討着當地姓姚个餔娘。兩公婆聽着台灣異闊，較好賺食，就在康熙58（西元1719）年從澎湖到淡水登陸，過幾年後，到這大壟底（這下个平鎮東勢）同原住民打約開墾。後來，子爺不管風吹日炙，發風落雨，早出暗轉，煞猛打拚，經過幾下代个奮鬥，正有今晡日个規模。
葉奕明降七个倈仔，就係所講个葉屋七大房，這七大房子孫當會承續阿爸个志氣，在大壟底創立公廳，祭祀祖上，名仔安到「祭祀公業葉奕明公嘗」，門楣頂寫等「南陽堂」，就係這下葉奕明公祠个地點。後來三房葉道高第二个倈仔葉徽傳試着三房人多，祭祀个時節公廳人尖人，轉攪毋得，就邀請兄弟在公廳東析幾十公尺个地方，另外起一座以「道高公」為祖个公祠，設立「祭祀公業葉道高公嘗」，安到「上公廳」，原來个葉奕明公廳變到「下公廳」。到光緒年間，葉發運、葉發訪將「上公廳」徙到這下个位所。
「下公廳」在光緒16（西元1890）年，由來台第五代19世葉發運、葉發南建議改建公廳，起到翹峨翹棟，看起來當像宮廟式个家祠，古典莊嚴（圖1）。
（圖1：光緒16年改建个葉奕明公廳舊貌，翻拍《祭祀公業葉奕明公祠重建落成慶典特刊》頁92，葉日隆提供。）
又經過百零年，因爭年久失修，主任委員葉雲特這兜宗親發起重建，在民國89（2000）年完成，入門所在加一座山門。歸隻新公廳外背看起來十分氣派，裡背雕樑畫棟，精雕細琢，龍騰鳳飛，相當个富麗堂皇，當像宮殿樣仔。大禾裎面前陂塘小橋、亭台花園、樹青草莠，做得講係東勢庄最靚、最派頭个公廳建築，人人阿腦个「東勢葉屋」。（圖2）
（圖2：民國89年新建完成个葉奕明公祠101.08.25）
因為葉奕明七大房，又當出丁，後代子孫當多，家族當大，大耕大種，出秀才，當時官員南北來往，長透會經過葉屋，做得講紅遍一時。葉屋有恁樣个成就，除忒人多，還愛有比人還較食苦个耐力，也經過艱苦个奮鬥，開墾个範圍正做得恁遽擴大，毋單止擴散到附近地區，還當遽擴張到隔壁庄頭、外縣市，田園闊野野吔，鳥仔就飛毋過，哪仔就係葉屋个田園所在。故所，當年到葉屋做長年个人，定著愛當早出門，當暗轉屋，當辛苦煞猛个做事，結果留下「做長年毋好去葉屋，天吂光就出門，半夜正轉屋，做吔三年，毋知頭家戴個係茅屋抑係瓦屋，田唇彎曲彎曲，榖擔擔擔百五六……」个順口溜。
葉奕明在大壟底開墾多年後，試着還有當大遍个土地還做得開發，就轉去故鄉，在乾隆10（西元1745）年，帶厥叔葉仁卿、葉仁奏共下來到附近仔个金雞湖開墾。仁卿、仁奏經過幾代過後，也有成就，起公廳（圖3），金雞湖一搭仔，大部分係葉家个土地。
奕明公後人有人往隔壁社仔庄、柑仔園發展，各行各業都有；仁卿公後人有兜徙到雙連陂、高山下、南勢墾殖，到今當多人在商業、政治界發展；仁奏公後人當多往關西發展，葉粹新通曉地理、中醫、建築，故兼任風水師及匠師。到這下，葉姓係平鎮區第7大姓，桃園市第16大姓，分佈當闊，台北、新竹、花東哪仔就有，毋過大部分集中到平鎮大東勢地區。
（圖3：原本个東勢金雞湖葉仁卿派下宗祠，這下已經拆除重建。101.10.09）
註：本文參考葉道高公嘗管理委員會謹製之《祭祀公業葉道高公嘗會系譜及會員名冊》頁4，中華民國辛未（1991）年；祭祀公業葉奕明公嘗管理委員會出版之《祭祀公業葉奕明公祠重建落成慶典特刊》。葉雲特主編，2000。岳父葉日隆老先生（大正9年生，1920）口述。

徐貴榮教授 聲檔 — 平鎮葉屋

▲BACK