畜狗仔

【文、圖／彭欽清／國立政治大學退休教授】

 

𠊎從細好畜狗仔，這生人到這下，頭尾怕識畜過十過隻。
四、五歲該下，屋下畜一隻烏狗仔，該央時全台灣盡多狗仔著着癲狗病，政府下令街路項、莊頭項个狗仔做盡愛捉起來毒（teu）死。吾爸就喊吾哥同狗仔帶去山項吾伯厥屋下，暫時搭在該。吾伯歇在銅鑼个八燕坑，行啊去愛點大零鐘。無想着第二日，狗仔嗄自家弄等轉來。
政大學校肚有盡多野狗，當多學生仔會去餵佢食。有个狗嫲一養就養七、八隻，狗子吂脫乳，較得人惜个就會分人捉去畜。幾下擺，實在忍毋核，𠊎也去捉一隻來畜。毋過，在都市肚畜狗仔實在異多baˇ bi，會吵着鄰舍，舞無法就同佢帶轉莊下老屋去畜。
這兜野狗好畜、會掌屋又有靈性。有一隻安做庫瑪个還會自家跳上圖牆企等掌歸條巷仔，遠遠看着有生份人行兼就會緊吠，一日跳上跳下幾下十到，練到胸脯凸凸，鄰舍見行過就會去同佢摸摸啊。
吾姆本成無麼好畜狗仔，會八十歲該下，佢血筋略略仔塞着，行動無異方便。有一日，在廳下橫着擘毋䟘起來，庫瑪看着就大聲緊吠，吾三哥聽着正遽遽出來同吾姆扶䟘起來。過後，吾姆見愛擘䟘起來行，就會喊庫瑪來在厥脣項看等。
吾姆八十四歲轉家，吾叔母驚講人來人往庫瑪會儘採吠，就同佢帶去厥屋下綯起來，吂知佢自家奮㪐走轉來，恬恬仔在後槓屋伏等，一直到好事辦忒，恁多人來來去去，佢全無吠，鄰舍都緊說講實在還有靈性。
畜狗仔畜恁多年，正知狗仔正經盡忠，佢係認定你係厥主人，無論你有錢無錢、有勢無勢，就認定到底。
冬下頭，𠊎盡愛去學校看野狗享受曬日頭个樣仔，無論脣項有幾多人行上行下，講話有幾大聲仔，仰仔緊品相佢，佢就在該睡到安然自在，這種黃狗曬核个境界，人有幾多儕做得着？


（四縣腔）
彭欽清教授 聲檔 — 畜狗仔

▲BACK