雙連坡史話（三）民俗信仰

【文圖∕徐貴榮∕國立中央大學客家語文暨社會科學學系兼任助理教授】

 

三百年前，雙連坡這高崗所在，歸片樹林同草原，闊野野吔無人安居，書頂也無麼个記載，兩口陂塘恬恬仔睡到這平野項，怕係鹿仔、鳥仔這兜動物自然在這生活，抑係原住民打獵个地方。

一直到清朝康熙末年，盡先來這開墾个姓謝先民，從福建漳州府帶等家鄉个三官大帝香爐來台，保佑水陸平安，登陸尋地，在這下福明宮脣項定居，安到「大庄」。來到這雙連坡地方，在一片廣大个相思林肚項，發現所在優雅，地理師講這係「雙龍朝三株聖地」，又發現一頭大樹當像「伯公」相貌，就在樹林肚起一座石頭伯公，安到「大庄伯公」，係雙連坡第一座伯公。

從該時節開始，這一搭个人，早暗點香，日夜敬拜，祈求五穀豐登，六畜興旺，風調雨順，合境平安，講也奇怪，伯公正經有保佑，有求必應，人民生活平安。後來在雙連坡出水口該位仔又安奉一座石頭伯公，守護雙連坡，民國17年改建變到「雙隆福德祠」，80年劉興燈先生發起重新改建安到「雙隆宮」，壁項碑文寫等雙連坡地理、伯公靈顯事蹟、起建人士這兜開發歷史。到民國42年，當地居民仕紳議論講，將大庄伯公原位重新起過變磚造雕花新廟，安到「雙龍福德祠」。

原先姓謝先民到來時，同三官大帝香爐安奉到自家屋下，早暗燒香敬拜，希望保佑闔家平安，開墾順利，五穀豐收。到乾隆54（1789）年，早年來自廣東饒平縣的劉奇珍、華珍、璞珍三兄弟子兒萬蔚（註），來雙連坡大庄，同姓謝个買地開墾耕田，姓謝个過後徙到中壢洽溪庄繼續開墾。謝、劉兩姓同兩庄人士眾信，共下尊敬這三官大帝為當地開基主神，兩庄輪流祭祀，各選爐主、首事。議定年年正月十五起福，八月十四叩答神恩做平安戲，評筊選出爐主，香爐跈爐主輪流奉祀。

隨後地方漸漸發達，人口慢慢增多，到民國12年，兩庄相議分香，神前評筶結果，來台老香爐還本本在雙連坡繼續供奉，洽溪另外新設香爐，也跈爐主輪流祭拜。「雙連陂庄」本庄个爐主、首事還係評筶照輪，起福、還福、平安戲一年行事日期還係照舊。

光復以後，工商進步，地方緊來緊繁榮，農業社會變到工業社會，生活步調緊來緊遽。後來个輪值爐主有兜愛上班，有兜當無閒，成時愛出外辦事，早出暗轉，長透無在屋下，地方人士想愛燒香當無方便，當多人就議論想起間廟，分人參拜較利便。民國72年正月初八，公推劉興典先生召集地方仕紳，發起興建三官大帝廟會議，同時選（1）本村內雙龍福德祠（2）雙隆宮福德祠（3）水波蓮花池這三个地理擇一隻，各在三官大帝、福德正神前評筶結果，都係選雙龍福德祠脣項這「雙龍朝三株聖地」土地，伯公也歡納，就決定好這下个地址，宮名安到「福明宮」。故所這下「福明宮」主神除忒「三官大帝」以外，還有「伯公」。

「福明宮」面積地點有295坪个土地，係劉家錦、劉家增兩兄弟傳下个，當時這兩兄弟識交代子孫，這兜土地毋好儘採變更亂用，子孫謹守祖先交代，都毋敢違背，一直都保持原樣，造林綠化環境，還係相思樹林。起廟委員會同這兩房派下子孫商參詳，兩房派下子孫都同意無償奉獻，作為起廟使用。

當時有委員善信提供十九名个優秀地理師，委員會決議在三官大帝神前推選評筶甄選，結果評着由平鎮山仔頂黃春木先生擔任地理師，當地點龍穴，在民國72年3月24吉時興工，到第二年（74年）11月16吉時登龕落成，打醮鬧熱，幾下萬人來踴躍參拜，香火鼎盛，這下廟屋頂還起有全世界最高个三官大帝神像。
（福明宮个主神除忒三官大帝以外，還有伯公。）

福明宮肚盡特別个係右片有一尊「福祿樹財神」。聽講在相思林个伯公祠脣項，一頭當大頭、當大頭、當特殊、當神奇个相思樹，有五十零尺高，九尺零圓，像一支大遮仔，牽紗揜等大地，形投像財神樣仔，到夜吔，在樹脣項長透會顯出昊光。四十零年前，有一日雷合雨大拚，𥍉爧響雷公，一個細孲仔牽等牛仔，堵堵從這頭樹下經過，好點點一陣電光𥍉啊下來，雷公竟貢，樹仔附近个禾草做下燒到變灰。細孲仔嚇到會死，一下歸身軟怠怠，煞煞飆等轉去，結果平安無事。聽講這頭樹仔分雷公打過後，伸着樹身骨節，樣仔看起當像財神，有人去求佢發財，聽講當靈。
（福祿樹財神，聽講當靈。）

72年起建福明宮个時節，就挖起該頭樹仔，發現分雷公打着个部分，樹皮脫落个部位，五形當像天然个長鬚，氣勢凜凜，將樹椏剁忒，原形略略仔修整過後，大約有九尺高，九尺圓，安奉到宮內右片，變成一尊「樹財神」分人參拜祈求。有人愛高價買轉去敬奉，毋過宮項个人、善男信女這兜毋肯。來宮項燒香參拜个人都試着實在怪奇，聽講有人同佢求財還異靈喔！想愛發財个人，就去求試看啊！無定著財神爺會降臨你唷！

到這下，福明宮正月十五起福，八月十四平安戲，還係年年照做，準係無像頭擺請人客、做鬧熱个情景吔，也少人來看戲咧！時代在該變，社會在該變，莫講姓劉人毋會講饒平客話吔，連當地四縣客話也緊來緊少人講。毋過，福明宮還係雙連坡這一莊人个信仰中心，也係客人个主要信仰，三官大帝、伯公還係本本保護等這兜莊項人啊！（本文以四縣腔寫成）


徐貴榮教授 聲檔—雙連坡史話（三）民俗信仰
（註）萬蔚原為璞珍之三子，因奇珍、華珍無後，將之過繼為奇珍、華珍之子。

▲BACK