新年新頭，大家愛做猴

【文／羅肇錦∕中央大學客家語文暨社會科學學系榮譽教授】

 

對一个識字又毋擔輸贏个人來講，新年新頭定著愛拿出無共樣个齣事，來同人撮眼花同人變奇術，正表示自家有本等，就像人講个：較無才調乜無好分人看衰小。故所驚見笑乜愛面肥肥仔出來做幾樣仔，同人無共樣个事情。
今年十二生肖係「狗年」，狗仔好吠，故所𠊎訂一個新題目，安到「講來講去講客家」。恁樣个題目盡闊盡淺盡無準則，儘採𠊎愛橫寫也直寫，愛長說也短評，愛冷風也係大雪，隨吾心順吾意。比將講：寫狗年講客家个拜狗頭行為、行路講退一步海闊天空、諺語講看人痾屎屎朏癢。著衫褲就講不怕窮人穿破衣、係相罵就講君子動口不動手、係相打就講惡手不當兩。這兜散論雜講做得用詩來表現，也做得用短篇小說來解析。係講右手無閒就用左手來寫詩，係講飲醉無力就講人聽毋多識个冷盤笑科，還過做得用短短个小說來講人情事故，無就用長到臭削个勸世文來瘋刺社會…，總講就係自由自在無束無縛，愛笑、愛噭、愛暢、愛譴、愛罵，全部做得拿出來講，這正安到講來講去講客家。
講來講去講客家第一篇係撮把戲仔起鼓用个，希望大家相招相報，食飽夜洗好身腳，就較遽來看今晡暗晡會出麼个菜？定著同前年个「試說舊語」無共樣，也同舊年个「拈禾串」無共味。人講人生七十古來稀，𠊎吂七十但係早就有古人个心情，希望就用這種古舊个心思，講出𠊎對客家歷史文化个人情世故，講出𠊎對客家無異滿意个燒燒冷冷。
最背尾，毋好毋記得，用客話寫作，愛靠大家共同來筆筆相思，慢慢耕耘，毋多知仔就會緊寫緊入文，緊寫緊精彩。這就係講來講去講客家，在這狗年新題時節，愛同大家新年新頭，暫時來做猴。


（四縣腔）
羅肇錦教授 聲檔 — 新年新頭，大家愛做猴

▲BACK