避暑个客家生活、生活客家

【文、圖／邱碧蓮／新屋國小客語教師】

 

記得做細人个時節，日常生活全部用客語，毋使特別去學習，因為該斯係日常、斯係生活，客家話个消失，主要係日常生活無用、無講，設計這教案主要係愛分客語重新轉來恩俚生活中，分大人細子在自然个環境學會講客，毋斯特別去學，在日常生活中，毋多知斯會講、曉聽、曉用。

【油桐花個別教學，看小朋友恁認真摺紙】
學生學習客語效果毋好个原因，有一部份係來自家長，當多个家長認為學習客家語係無用个，考試又無考，用該時間不如去學習英文，學習其他个才藝，關於傳承客家語這件事情，對家長來講毋係重要个。改變家長个想法，也係一門重要个功課，利用避暑期間，用夏令營个方式分學生來參加、來尞，家長對正式學習外个課程通常會用較寬鬆个心情接受，課程內容除忒傳統个唸謠、唸課文，還有盡多好爽（註1）生趣个內容，表面䀴（註2）起來係：打粄圓、摺紙、遊戲…等，毋過，客語个教學，已經恬恬無聲無息摎教學活動結合了。
希望客家話做得像華語樣，係學習用个語言、係公關語言，也係生活用語言，除了學校个客語課程外，可以用較生活、較生趣个方式來學習客家話。䀴起來像係做手藝、像爽樣，事際上佢已經不知不覺中學習客語，透過這方式學著个語言，正做得長久，正會提（註3）來用。

【共下學習，先生用客語摎學生打嘴鼓】
所有个學者都提出「客語生活化」或者提出「客語生活學校」，但係，客語生活學校除忒母語課以外，行出教室還有麼人講客？恩俚希望个係其他課程乜用客語來進行，日常生活个種種也用客語，比論講：相借問、打嘴鼓、相湊出去尞等等。時間久了，在日常生活中講客斯會「習慣成自然」，落實正經个生活客語、客語生活。

【學做油紙遮，大小朋友會互相學習】
無限定麼介年齡个學生，不同年齡个學員，會互相學習，透過合作學習成果更加好，年紀大个渡較細个，手巧个做細先生，先從簡單个色目開始教學，認識色目後，教數詞、量詞，不知不覺中從簡單个單詞變句仔。學習無壓力，學習有成就，過程盡生趣好爽，學生仔會在避暑个學習過程中學會語言，學會手藝，夏令營个形式家長放心。

【打粄圓盡好搞，細人仔毋會感覺無聊】
頭擺个細人仔避暑除忒𢯭手屋下做田事，滿哪走，所有䀴得著个東西全係玩具，麼介東西全做得變成童玩，拈蛇打𧊅，避暑作業等開學前正來愁，爽水泅水無愁無慮快樂避暑。這下該細人仔毋知愛講幸福也係衰過，食著都當豐裕，毋過，避暑爺哀都愛上班，全部愛去補習班無斯安親班，設計這隻一片爽一片學習个活動，重要个係細人仔毋會感覺無聊，無試著係上課，自由自在。係異好个方式，大家來試阿！效果盡好。（本文以饒平腔寫成）


（饒平腔）
邱碧蓮聲檔 － 避暑个客家生活

註1：爽，饒平客語玩之意。
註2：䀴〔ngiang53〕，直視。玉篇‧目部：「䀴，直視。」廣韻‧上聲‧迥韻：「䀴，直視貌也。」
註3：提取，拿取之意。

▲BACK