拜問義民爺

【文、圖／彭欽清／國立政治大學退休教授】

 

義民爺係台灣客家人个本土神，最早起个義民爺廟在新竹枋寮，佢个祭祀圈大體係講海陸个。
有一年台北市義民祭典，主辦單位講愛用𠊎發表過个拜問義民爺這首詩，尋兩個國小个學生仔來讀分義民爺聽，𠊎就同佢改到海陸。
今年係台北市義民祭三十週年，台北市客家文化主題公園有同這首詩展示出來，有朋友看著，問講做得讀出來放到網站分較多人讀還聽無，來分較多人了解義民爺係仰仔保家衛鄉，想啊了也著，就利用這機會來同大家分享。

拜問義民爺

手擎清香，
誠心个來拜問：
義民爺，
你該央時
仰會恁煞？
仰會恁攉得落手？
明知這擺出門，
大體會有去無轉，
毋過
你還係行向戰場。

義民爺，
你愛踏出門該下仔，
你个餔娘，
你个子女，
敢無跪下來？
揪等你个手，
目汁濫泔个求你講：
莫去哪！ 莫去
顧好自家个屋，
耕好自家个田，
掌好自家个地，
一家人順順序序
毋係盡好！
閒事莫搭恁多哪，
大眾个事
敢有爭差着你一儕？
莫去哪！ 莫去

義民爺，
你係毋係正經恁刻情？
餔娘子女个聲聲句句
你全無聽入耳。
㧡啊起擔頭
你目珠無𥍉，
頭那無斡，
跋腳就走？
也係
囓等牙根，
忍等目汁，
你千毋盼得，萬毋盼得，
刻耐仔正走得開腳？

義民爺，
最尾來拜問哪，
你著傷橫到戰場
伸最尾幾口氣个時節，
係毋係有想起
家鄉个屋、
家鄉个田、
家鄉个地？
係毋係有想起
屋下个爺哀、餔娘、子女？
係毋係有想起
愛出門該下
屋下人个聲聲句句？
義民爺 義民爺，
你係毋係？
你係毋係感覺著
盡痛腸？


（海陸腔）
彭欽清聲檔 － 拜問義民爺

▲BACK