雙連坡史話（二）開發故事

【文圖∕徐貴榮∕國立中央大學客家語文暨社會科學學系兼任助理教授】

 

清朝「雙連陂庄」（註1）這隻所在，分「雙連坡」同「高山下」兩隻小地方，台灣光復以後，這兩小庄就變到「雙連」同「高雙」兩個村里，分別保留「雙」字。三百年前，大約在清朝康熙末年，盡先來這開墾个先民係由福建漳州府來个姓謝人士，經過幾十年个開田定居，安到「大庄」。到乾隆初年，正轉手分從廣東饒平縣來个姓劉人，姓謝人徙到中壢洽溪庄發展。故所，這下雙連坡一搭仔，姓劉人較多。

乾隆12（1747）年，開饒16世，27歲个劉奇珍帶等兩個老弟華珍、璞珍三兄弟，還過厥大哥个兩個倈仔劉舉、劉邑，總共五儕人，從廣東饒平縣元歌都山前鄉牛皮社來台。初下碼來到台北八里岔觀音山下暫時安居，開田打林。

（圖1：中壢正大街「燃藜第」劉屋公廳100.8.28）

大哥廷珍公在原鄉無來台灣，二哥奇珍公討黃氏無降、三哥華珍公無討，兩房無子息。璞珍公討林氏降武略、萬炳、萬蔚（同萬炳雙生仔）、萬萃四個倈仔，還有娥、眉兩個妹仔，璞珍公就將第三個倈仔「萬蔚」頂分奇珍公、華珍公。大約四十二年後，因為學老、客人無合，時常混亂，相打放火，就賣忒產業，徙到桃園龜山崁頂。萬蔚頂承奇珍公、華珍公兩大房，得着六千個龍銀；璞珍公三千龍銀，由武略、萬炳、萬萃三兄弟各得一千個龍銀，兄弟獨立門戶創業。

大哥武略討王氏單降一子，後代徙到平鎮、新屋、湖口耕種為生。二哥萬炳討林氏降四個倈仔，後來搬到中壢三座屋，擴大到大崙、平鎮耕田。萬蔚討林氏降五個倈仔，後來移徙雙連坡大庄，同原來在這墾拓个謝姓業主買地開墾。老弟萬萃討黃氏降五個倈仔，先搬到新莊、宜蘭，後來轉來平鎮北勢買田耕作。來台第二代四大房，開基散葉，子孫大約分居龍潭黃泥塘，中壢三座屋、大崙，平鎮北勢，新屋，湖口這兜地方耕田，並在中壢三座屋（圖1）起公廳敬拜歷代祖先，安到「燃藜第」。

（圖2：璞珍公婆墳101.4.29）
劉家祖先个風水當多都做到福明宮到雙連坡之間，璞珍公在福明宮右片大約100公尺个路脣落去（圖2），來台三兄弟个祖塔，在雙連坡西片矮山排項，也就係南方莊園前150公尺左右个路下，舊年（民105，2016）正翻修完成（圖3、4）。聽講頭擺去掛紙，春來落雨，雙連坡个水係淰起來，路過毋得，還愛坐船過去正做得咧！

「雙連陂庄」經過劉姓人个開發，還過其他少數姓人个經營，正有後來農田發展、人民安樂个樣仔，雙連坡這兩隻陂塘有過當大貢獻。這下，雙連坡个功能無吔，面積也縮細咧！正伸着一隻陂塘定定！孤單影獨，無伴無友，無聲無息，恬恬仔睡到天下，大地頂高（註2），成下仔一陣風吹啊過來，水搖激啊搖激（註3）欸！像老人家同你在該講等雙連坡个歷史。（本文以四縣腔寫成）

徐貴榮教授 聲檔—雙連坡史話（二）開發故事
註1：「台灣百年歷史地圖」標示「雙連陂庄」，近代地圖標示「雙連坡」，故本文談及昔時庄名用「陂」，現代地名則用「坡」。
註2：睡到天下，大地頂高：睡在普天之下，大地之上。上，音haˊ/haˋ。
註3：搖激啊搖激：搖盪啊搖盪著。激，音gieb/giebˋ。

（圖3：祖塔106.11.17）

（圖4：祖塔碑石106.11.17）

▲BACK