面

【文∕羅肇錦∕國立中央大學客家語文暨社會科學學系榮譽教授】

 

這隻「面」字，在大陸，作得用兩種意思，一個係食麵个「面」，另一個係面皮個「面」，兩隻字全無關係，結果為著愛寫簡體，就恁樣強強鬥共下，實在有算發冷。這兜今晡日在台灣，難得保留下來个漢字用法，定著愛好好留傳下去，毋好學大陸改用簡體，變到鬍鬚馬加，無準無則。

故所客家話个「面」淨用面皮、面目、面相、面闊、面形、面色、變面這兜同面有關个名詞同形容詞定定。先講面皮，係講人面項个一層皮，大家面項這層皮分人看起來全無共樣，正有辦法認識哪張皮係麼人，大家一生人就一張面皮定定，縱然現下有整形手術做得變面，乜還共樣一畲一張面皮。既然一畲人一生就淨一張面皮，該面皮定著當重要，無聽人講「樹有樹皮，人愛面皮」，就係講人个面皮就像厥个名聲共樣，做毋得分人恥笑，分人瀉面子，故所對一个無人格毋知見笑个人，大家就講佢「無面無皮」、「面皮八尺厚」。

面皮係面項分人个評判同尊重，另外有「面目」、「面相」係用你既有个面形，對你做出佢自家對你个價值高低个評量，像「看面目」係用面目个靚醜來分你分數，同你熟識就認定你係好人，以前用盡多該情形係先生打分數毋公平，就講「先生看面目」。另外「看面相」又乜係算命个人，個人自家對你个運勢所做个評估，可信毋可信全無一個準則。其他講人頑頑安到「牛面」，講人虛浮暴躁安到「猴面」，戆面戆面安到「脧面」，異有細妹緣个細倈安到「癡哥面」，這兜全部係用面目來講个好壞評價。

有兜人還用人个面型來推斷佢下二擺个成敗，像男人「頭大面四方，肚大食四方」，細妹人面頰卵剋剋，就講會剋夫敗家，這完全係性別歧視个老狗屎，現下無人會相信了。無過用面色來斷人个習慣，還真多人相信，像講人面無表情安到「面窒窒」，講人更講都無肯聽安到「面舐舐」，推斷人身體有病，也係營養無罅，就講「面黃黃」，尤其犯著黃疸病，無藥可醫安到「黃病」，小人仔營養不良，故所「掌牛哥仔面黃黃，三餐食飯愛摟糖。」這全係用面色去看人好壞，像紅蘿花色就係健康有精神，面澳澳就係有病無元氣，面肥肥就係講毋聽不受教。

最背尾，還有「春天面時時變」个變面，翻面無識人个「貶面」，人生幾十年，盡驚个面，大概就係「貶面」同「變面」，人講：人心難測海水難量，貶面就像掀書樣。（本文以四縣腔寫成）


羅肇錦教授 聲檔—面

▲BACK