搞潭精摎摝屎棍

【文∕彭瑞珠∕國立中央大學客家語文暨社會科學學系客家語文碩士班畢業生】

 

語言調查係一項異生趣，乜異得人畏个頭路。生趣，係因爭調查个過程做得得著盡多寶貴个語音摎詞彙个資料，還過做得增加自家異多个常識摎智識；得人畏，係因為調查轉來愛整理、比較該兜資料，收尾个頭路盡得人畏。
異多人看著吾姓、聽著𠊎講四縣，就會問𠊎：
「你姓彭，仰講四縣呢？」
可見一般人對語言个分佈，乜有多少仔了解：知講，姓彭个客家人係講海陸腔較多。
記得𠊎還細个時節，分吾安然姊渡，輒常在吾文英姑屋下尞，有一日臨暗仔，𠊎愛轉屋下食夜吔，吾姑講：
「該黃瓠拿轉去啊！」
平常時，𠊎聽屋下阿婆、阿太講「雞髀」、「爌肉」就知好挾來食。該日仔，吾姑喊𠊎擐一粒「黃瓠」轉去，𠊎斯全全抓無頭䌈，任尋，都尋無黃色个瓠仔。因為，海陸腔个「黃瓠」摎四縣腔个「番瓜」，係共種東西，毋過詞彙全全無共樣。
在海外做語言調查，詞彙鬥毋著个情形就係恁樣，聽到人異昂，毋過還係異生趣：比將講「一坵田」，吾發音人講「一隻阿卡」；𠊎講「標頭」，佢講「麥頭」。毋過，有兜个詞彙又做得鬥到堵好堵好、共樣共樣，像「搞潭精」、「摝屎棍」都係恁樣。吾發音人異詳細，還問𠊎：
「係講『男仔』？還係講『妹仔』？」
「細倈人摎細妹人，敢無共樣？」
佢講，係用來講細妹人，就講佢係「搞潭精」；係講細倈人，正講佢係「摝屎棍」。
異生趣嗬？平常時乜會使用這兜詞彙，毋過，較少去分講有「細妹人限定」，還係「細倈人限定」个問題。
做研究个人，該當愛尋出厥原因：因為，山歌「月有情」有唱講「二月裡來月有情，廣西出有搞潭精；搞潭生有八九子，搞亂天下不太平。」故所講，「搞潭精」係講細妹人，有憑有據，該當無問題；該，「摝屎棍」仰會係細倈人限定个？吾發音人講：
「因為，女人無『棍』！」
你問𠊎，麼个棍？就該「棍」。
詞彙調查，一般都會問著一個詞條「男性生殖器」，你會仰仔回答？吾發音人正經異詳細，還問𠊎：
「係大支个？還係細支个？大支个，就『⿴棍』哦；細支个，就係『⿴子』唷！」
你問𠊎，仰摎佢消音？係啊，因為𠊎係細妹人，在公共場所講，會分吾爸用五公醢敲，故所，𠊎自家消音，毋過，你一想，該當乜知咧。
語言調查个事頭，正經異得人畏，毋過，單淨幾隻仔詞彙，就做得分𠊎拿來寫到恁樣一大篇，你就知，做語言調查有幾好搞欸哩！
彭瑞珠 聲檔—搞潭精摎摝屎棍

▲BACK