挨礱牽鋸，有食懶去

【文／彭欽清∕國立政治大學退休教授】

 

這下个人尋頭路，大體愛尋軟賺个事來做，略下仔較苦个事，輒常尋無人做，當多人甘願在屋下食閒飯。
自古以來大體人都好食懶做，有兜人還甘願毋食，也毋肯做苦事，故所正會有「挨礱牽鋸，有食懶去」這句客話。
原在人愛食一碗飯無恁該。就淨拿穀愛變到米來講，愛先礱穀，挨礱就係使礱个動作，愛一𢱤一拉，做毋得忒細力慢慢仔挨，又做毋得出狂力挨忒遽，愛用暗力匀勻仔挨，礱正毋會齬齧着。
穀礱下來會有礱糠同粗糠仔，礱糠係穀个殼，當虐削。毋過，礱糠同粗糠仔都盡好用。穀礱脫殼忒就係糙米。糙米還愛舂過，正會變到白白个米。跈等佢舂下來幼幼仔个末仔，係幼糠仔，乜當好用。無論粗糠仔抑幼糠仔愛篩忒，正會有淨个糙米抑係白米。故所，愛同穀變到飯正經有一手好搣，莫怪老人家係看着後撐仔飯糝無划淨，就會緊罵恁折福。
同礱穀差毋多恁硬斗个事係鋸樹仔抑鋸樵。原在人煮三餐定著愛用着樵杈，撿轉來个樵杈，細枝个拿來剁到一截截仔，較該食，大筒个就較難耐，愛先鋸到樵截仔正做得拿來破樵析。無論倒樹仔抑鋸樵就愛用着鋸仔，牽鋸就係使鋸仔，同挨礱共樣，愛勻勻仔使暗力，無就會夾鋸，鋸毋會停動。
鋸大頭个樹仔抑大筒个樵愛用大鋸仔，下擺仔還會用着雙人鋸，兩儕人一儕使一頭，鋸啊來鋸啊去，故所正會有「親戚像牽鋸，有來正有去」這句話。鋸齒當利，係使無好勢會先鋸着手。這下，挨礱牽鋸這兜苦事早就用機器來做了。
人愛把變正賺得着人个錢，這下流行文創，係講有場所分人來體驗挨礱牽鋸个艱辛，無定異多人會試着當生趣，聽啊着挨礱牽鋸會相賽走等去。

(四縣腔)
彭欽清教授 聲檔—挨礱牽鋸，有食懶去

▲BACK